12 naýryz kúni Monrealda (Kanada) boks keshi ótedi, oǵan qazaqstandyq boksshy Sadriddin Ahmedov (11-0, 10 KO) qatysady, dep habarlaidy Sports.kz portaly.
Eye of the Tiger Management promoýterlik kompaniiasynyń málimeti boiynsha 22 jastaǵy jastar arasyndaǵy WBC álem chempiony jáne birinshi orta salmaqtaǵy WBC Asia belbeýi iegeriniń qarsylasy 32 jastaǵy tájiribeli boksshy meksikalyq Maýro Alberto Lozano (33-10, 24 KO) bolmaq.
Lozano byltyr 24 tamyzda sońǵy jekpe-jegin ótkizip, burynǵy álem chempiony, britandyq Liam Smitten (29-2-1, 16 KO) tehnikalyq nokaýtpen jeńildi. Sonymen qatar onyń qarsylastarynyń qatarynda Vanes Martirosian (36-4-1, 21 KO), Djermell Charlo (33-1, 17 KO) jáne Patrik Teisheira (31-1, 22 KO) bar. Biraq latynamerikalyq joǵaryda aty atalǵan boksshylardyń bárinen utylǵan.
