Jeltoqsan oqiǵasyna qatysýshylarǵa «Bostandyq úshin kúresken qaharmandar» deitin arnaiy mártebe berý kerek. Ulttyq akademiialyq kitaphanada ótken «Jeltoqsan. 1986. Dekabr. Dokýmentalnaia hronika» atty kitaptyń tanystyrylymy kezinde Saiasi qýǵyn-súrgin qurbandaryn tolyq aqtaý jónindegi memlekettik komissiianyń múshesi Sabyr Qasymov osyndai usynys aitty, dep habarlaidy QazAqparat.
«Jeltoqsan kezinde zardap shekkenderdiń sanyn turaqtandyrýymyz kerek. Biz qazir Saiasi qýǵyn-súrgin qurbandaryn tolyq aqtaý jónindegi memlekettik komissiianyń tarapynan osy kúnge deiin Jeltoqsan boiynsha isti bolǵan jastardyń nesheýi aqtalǵanyn suratyp jatyrmyz. Aqtaldy degende, sottalǵandar men qamaýǵa alynǵandardy aityp otyrmyz. Onyń ózinde sol kezdegi militsiianyń tizimine túskender ǵana aqtalǵan. Al qansha jastardy aldyn ala qamaý kameralaryna, arnaiy jabdyqtalmaǵan qosymsha oryndarǵa aparyp qamai berdi?! Solardyń sanyn áli eshkim turaqtandyrǵan joq», - deidi «Qaharmandar» respýblikalyq qoǵamdyq qorynyń prezidenti.
Zańger ǵalym Jeltoqsanǵa qatysqany úshin sottalǵandardyń arasynda belgili bir sebeptermen aqtalmai qalǵandary da bar ekenin aitady.
«Sottalǵandardyń naqty sany 103 dep júrmiz. Olardyń kóbi aqtaldy. Militsiiaǵa qarsylyq kórsetkeni úshin aqtalmaǵan Myrzaǵul Ábdiqulov siiaqty biren-sarany aqtalǵan joq. Ol da ózine shabýyl jasalǵanda pyshaqpen qorǵanǵanyn bilesizder», - dedi Sabyr Qasymov.
Memlekettik komissiia múshesi Jeltoqsan batyrlaryna arnaiy mártebe berý ne úshin qajet ekenin de aitty.
«Biz Jeltoqsanǵa qatysqan otandastarymyzǵa «Bostandyq úshin kúresken qaharmandar» degen mártebe berýimiz kerek. Sondai statýs berilse, olardy aqtaý, áleýmettik jaǵynan qorǵaý, tarihi ádildikti qalpyna keltirý siiaqty kóptegen máseleniń túiini ózdiginen sheshimin tabady. Jeltoqsan oqiǵasyna qatysqany úshin jazalaý, qýǵyndaý sharalarynan zardap shekkenderdiń de sany eseptelýi kerek. Oqiǵa eń bir shielenisken tusta Almatydan ózge óńirlerde de jastar shyqty. Tolyq san eshkimde joq. Solardyń qanshasy aqtaldy? Almatyda 600-den astamy aqtaldy. Al oblystarda qanshasy eskerýsiz ketti. Solardyń bárin naqtylaý mindeti tur aldymyzda», - dedi ol.
