Shymkentte kovidpen aýyrǵandardy qabyldaityn aýrýhanaǵa 29 jastaǵy júkti kelinshek tústi. Júktiliktiń 39-shy aptasyndaǵy áielge dárigerler shuǵyl túrde kesar tiligin jasady dep habarlaidy Otyrar arnasyna silteme jasaǵan KAZ.NUR.KZ.
Kelinshektiń dene qyzýy óte joǵary bolǵan, sondai-aq, jótel mazalap, koronaviýsqa tapsyrǵan PTR synaq oń nátije kórsetedi.
Kompiýterlik tomografiia jasalǵan soń, júkti kelinshektiń pnevmoniiaǵa shaldyǵyp, eki ókpesine de daq túskeni anyqtalady. Al Chinar Koraeva qursaqtaǵy sábige de virýs juǵýy múmkin ekenin múlde oilamaǵan. Emdelip, tabiǵi jolmen bosanamyn dep josparlapty.
"Ai-kúnim jetip otyrǵan soń, maǵan erekshe kútim jasady. Kezekti tekserý kezinde qursaqtaǵy sábidiń júrek soǵysy baiaýlaǵany baiqaldy. Onyń aman qalý múmkindigi azaia bastaǵan kezde, dárigerler dereý kesar tiligin jasady. Alǵysym sheksiz", - deidi Chinar Koraeva.
Kesar tiligi tez jasaldy, alaida, qiyndyqtyń barlyǵy otadan keiin bastalǵan. Óitkeni, sábi óte aýyr jaǵdaida týylyp, ózdiginen demala almady. Dárigerler náresteni dereý ókpeni jasandy jeldetý apparatyna qosqan.
"Shaqalaqtyń jaǵdaiy tym aýyr edi. On baldyq Apgar shkalasymen eseptegende, sábidiń jaǵdaiy 1-3 balǵa sai boldy. Óitkeni, gipoksiia men asfiksiiaǵa shaldyqqan sábige aýa jetken joq. Koronavirýsty infektsiia saldarynan anasynyń jatyry men platsentti bóligine zaqym keledi. Anasymen birge, ishtegi bala da ziian shekken", - deidi ota jasaýshy ginekolog Mýslim Gasanov.
Eń bastysy, dárigerler sábidi de, anany da aman qalyp qaldy. Kelinshek eki kúnnen soń jansaqtaý bóliminen shyqty. Al balany kovidtik aýrýhanada qaldyrmai, qalalyq perzenthanaǵa aýystyrǵan. Búginde dárigerler sábidiń jaǵdaiy da jaqsaryp qalǵanyn málimdedi.
