Qazaqstannyń halyq ártisi Roza Rymbaeva Qazaqstannan shyqqan Anatolii Tsoimen birge reseilik "Dýety" shoýynda án saldy, dep habarlaidy Sputnik Qazaqstan.
"Rossiia 1" arnasyndaǵy "Dýety" shoýynyń ereksheligi – munda tanymal ártister óziniń kimmen án salatynyn bilmeidi. Eki oryndaýshynyń ortasynda án aiaqtalǵansha biik qabyrǵa turady, ol tek ánniń aiaqtalýyna sanaýly sekýnd qalǵanda ashylady.
Bul joly qazaqstandyq qos ánshi bir sahnada án aitamyz dep oilamaǵany anyq kórindi. Roza Rymbaeva sahnaǵa shyǵar aldynda ekinshi ánshi er adam bolsa eken degen tilegin bildirdi, alaida áiel bolsa da birlesip ándi oryndap shyǵatynyn jetkizdi.
"Maǵan ózimniń tyńdarmandarym arasynda eń tanymal "Liýbov nastala" ánim tústi. Bul ádemi ándi oryndaý arqyly vokaldyq múmkindik pen sezimdi kórsetýge bolady. (...) Bul ándi er adammen oryndaǵym keledi. Biz bir-birimizge sáikes kelemiz be dep ýaiymdap turmyn. Resei ǵana emes, búkil Qazaqstan meni kórip otyr, endi masqara bolmaý kerek. Men masqara bolsam, qazaqtar meni keshirmeidi", - dedi Roza Rymbaeva sahnaǵa shyǵar kezde kúlip.
"Ol (Anatolii Tsoi – Sputnik) menen bir oktavaǵa joǵary án saldy. Men tańǵaldym. Qulap qala jazdadym. Jaraisyń, balaqai!", - dedi Roza Rymbaeva Tsoi týraly.
Al Anatolii Roza Rymbaevamen birge án aitý kópten kútken armany ekenin jetkizdi.
"Jas kezimnen Roza Qýanyshqyzynyń jankúierimin. Men búgin ol kisimen birge án aitamyn dep oilamadym. Shoý maǵan mereke syilady", - dedi ol.
Shoý júrgizýshisi Nikolai Baskov ánshilerdiń shoýynan keiin Qazaqstanda talantty adamnyń kóp ekenin aityp, elge jalyndy sálem joldady.
Anatolii Tsoi Almatyda dúniege kelgen. Ol birneshe ret mýzykalyq jobalarǵa qatysyp, ózin sahnada synap kórdi. Reseilik "Hochý k Meladze" shoýynan keiin keńinen tanyldy. MBAND tobynyń ánshisi boldy. Sondai-aq Reseidegi alǵashqy "Maska" shoýynyń jeńimpazy atandy.
