Shyǵys Qazaqstan oblysy Ridder qalasynda maskúnem ana balasyna múlde qaramaǵan, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, tártip saqshylary qolaisyz otbasylardy únemi baqylaýda ustaidy. Qarasha aiynyń basynda 3 jasar ulymen birge turatyn 41 jastaǵy áieldiń úii tekserildi.
Sonyń nátijesinde birqatar buzýshylyqtar anyqtaldy. Áiel úide mas kúide jatqan.
«Úi ishi sýyq, ári astań-kesteń bolyp shashylyp jatty. Ábden ashyqqan qarshadai balanyń ústi-basy kir bolǵan. Sonymen qatar bul úide balanyń qolaily ómir súrýi úshin jaryq, sý jáne basqa da qajetti jaǵdailar múlde joq bolyp shyqty», - delingen aqparatta.
Qazirgi ýaqytta búldirshin qalalyq balalar aýrýhanasyna jatqyzylǵan. Odan ári ony kámeletke tolmaǵandardy qoldaý ortalyǵyna ornalastyrý josparlanyp otyr.
Politseiler áiel adamdy ata-ana quqyǵynan aiyrý týraly ótinishti kámeletke tolmaǵandardyń quqyqtaryn qorǵaý jónindegi komissiiaǵa joldamaq.
