Túrkiia eldiń ońtústik-shyǵysynda orman órtiniń saldaryn eń qysqa merzimde joiyp, apattan zardap shekken aýdandardy qalpyna keltirmek. Bul týraly Túrkiia prezidenti Rejep Taiip Erdoǵan CNN Turk jáne Kanal D telearnalaryna bergen suhbatynda málim etti, dep habarlaidy "Ult aqparat" Anadoly agenttigine silteme jasap.
«Órtengen ormandar qalpyna keltiriledi. Biz bul aýmaqqa jańa aǵashtar otyrǵyzamyz, munda qaitadan ormandar paida bolady», - dep málimdedi túrik kóshbasshysy.
Onyń aitýynsha, tabiǵi apattan zardap shekken aýmaqtarda qurylys jumystary bir aidan keiin bastalady. Memleket basshysy olardy bir jyldyń ishinde aiaqtaý josparlanyp otyrǵanyn qosyp ótti.
Prezident Erdoǵan sondai-aq, Túrkiia sońǵy bes jylda orman aktivteriniń aýmaǵyn kótergen elder reitinginde 46-shy orynnan 27-ge joǵarylaǵanyn atap ótti.
Túrkiianyń koronavirýsqa qarsy kúres júrgizý sharalaryna toqtalǵan prezident, el biligi barlyq turǵynǵa vaktsina saldyrtýdy kózdep otyrǵanyn málimdedi. Erdoǵan bul maqsatqa jetý úshin qajetti resýrstar túgel jumyldyrylǵanyn aitty.
Túrkiia prezidenti koronavirýsqa qarsy TURKOVAC vaktsinasy shyǵarylatynyn málim etti. «Búgingi kúnge deiin jaqsy nátijelerge qol jetkizildi. Jyl sońyna deiin jaqsy jańalyq estýge úmittimiz», - dedi ol.
Túrkiia prezidenti sondai-aq, «Taliban» qozǵalysy jasaqtarynyń basyp alý jaǵdailaryna bailanysty Aýǵanstandaǵy ahýaldy sóz etti. Onyń aitýynsha, ol bul eldegi jaǵdaidy Katar biligimen talqylady. «Búgin keshke Katar biligimen kelissózder júrgizdim, biz Taliban jasaǵan qadamdardy qalai toqtata alatynymyzdy, beibit jolǵa qadamdy qai jerde jasai alatynymyzdy talqyladyq», - dedi prezident Erdoǵan.
