Densaýlyq saqtaý ministri Aleksei Tsoi buǵan deiin koronavirýsqa qarsy vaktsina alǵan azamattarǵa qaita ekpe salý 22 qarashada bastalatynyn aitty, - dep habarlaidy Tengrinews.kz agenttigi.
"Revaktsinatsiia 22 qarashadan bastap eki kezeńde júzege asyrylady. Birinshi kezekte táýekel tobyndaǵy adamdardy vaktsinatsiialaý úshin biyl jyl sońyna deiin alǵashqy ekpe alǵan merzimin eskere otyryp, meditsina qyzmetkerleri, pedagogtar, meditsinalyq-áleýmettik mekemelerdiń, jabyq balalar mekemeleriniń qyzmetkerleri, áleýetti qurylymdardyń qyzmetkerleri qaita ekpe alatyndardyń qataryna jatady", - dedi Tsoi Úkimet otyrysynda.
Ol 60 jastan asqan adamdardyń, sondai-aq óz betinshe test tapsyrǵan jáne koronavirýsqa antideneleri teris test nátijesin kórsetkenderdiń belgilengen merzimderin esepke almai, revaktsinatsiiaǵa jiberiletinin naqtylady.
Premer-ministr Asqar Mamin vaktsina salý pýnktteriniń, meditsinalyq uiymdardyń jáne meditsina qyzmetkerleriniń daiyndyǵyn qamtamasyz etýdi tapsyrdy. Sondai-aq, Tsoi Qazaqstanǵa Pfizer vaktsinasyn jetkizý týraly aitty.
"Balalardyń, júkti jáne bala emizetin áielderdiń koronavirýs infektsiiasyna qarsy vaktsinatsiiaǵa qol jetkizýin qamtamasyz etý maqsatynda 4 million 230 doza vaktsina satyp alyndy, bul 2 million 115 myń adamdy qamtýǵa múmkindik beredi. Vaktsinatsiialaýǵa 12-den 17 jasqa deiingi balalar, júktiliktiń 16-37 aptasy merzimindegi júkti áielder jáne bosanǵannan keiin 42 kúnnen keiin bala emizetin áielder jatady. Comirnaty Pfizer vaktsinasyn saqtaý erekshelikterin eskere otyryp, Qazaqstannyń 16 óńirine jetkizilgen 34 birlik tońazytqysh satyp alyndy. Sonymen qatar, qosymsha 51 tońazytqysh satyp alyndy, qarashanyń sońyna deiin óńirlerge jetkizý josparlanyp otyr", - dedi Aleksei Tsoi.
