Reseidiń Tver oblysy Rjev aýdany aýmaǵynda júrgizilgen halyqaralyq ekspeditsiia barysynda «Pioner» izdeý toby soǵys jyldary qaitys bolǵan qazaqstandyq jaýyngerlerdiń súiekterin tapty. Bul týraly top jetekshisi Mihail Bogdanovtyń áleýmettik jelidegi paraqshasynda jariialandy, dep habarlaidy QazAqparat.
Qazirgi ýaqytta aqmolalyq Zeinolla Maqaev, Kamen Jumanov jáne Qaraǵandy oblysynyń týmasy Jaǵypar Orazbaevtyń esimderi jazylǵan medalon tabyldy.
Top jetekshisi Mihail Bogdanovtyń aitýynsha, Rjev aýdanynyń jerinde sol qorqynyshty ýaqyttyń kóptegen «aiǵaqtary» - jaýyngerlerdiń, oqtardyń, snariadtardyń qaldyqtaryn kezdestirýge bolady.
«Asyqpai jerdi qýys burǵymen tekserip júrgen edim. Eńkeie bergenimde jer betinde ólim medaliniń bakelittik qaryndash kapsýlasyn baiqap qaldym. Mundai jaǵdailar jii bolyp turady, biraq meniń tájiribemde birinshi ret. Kapsýlanyń qaqpaǵyn burap ashyp edim, ishinde jazbasy jaqsy kúide saqtalypty», - dep bólisti top jetekshisi áleýmettik jelide.
Belgili bolǵandai, ol kapsýla jaýynger Zainýlla Makaevka tiesili eken.
«1922 jyly týǵan, qyzyl ásker-114-shi jeke atqyshtar brigadasynyń atqyshy, zagradotriad (2-shi vzvod), jaýyngerdiń meken-jaiy (otbasynyń meken - jaiy): Qazaq KSR, Aqmola oblysy, Aqmola qalasy, Telman kóshesi, 41-úi, anasy - Bátima Mámirova», - delingen qysqa jazbada.
Belgili bolǵandai, qyzyl ásker jaýyngeri 11.08.42 jyly «Belkovo-Svinino» tirek pýnkti úshin shaiqasta qaza tapqan.
Aqmola oblysynyń taǵy bir jaýyngeri Kámen Jumanov 1941 jyly Qorǵaljyn aýdanynyń Kirov atyndaǵy keńshardan Qyzyl Armiia qataryna shaqyrylǵan. Osy ýaqytqa deiin ol habar-osharsyz ketken dep sanaldy. Qazirgi ýaqytta onyń urpaqtary Qorǵaljyn aýdanynda turyp jatyr. Jergilikti jýrnalister Kamen Jumanovtyń qyzy Mádeniet apaidy izdep tapty. Jasy 83-tegi keiýananyń aitýynsha, ol ákesi maidanǵa ketken kezde úsh jasta bolǵan. Onyń qolynda qazir ákesiniń soǵysqa deiingi fotosýreti ǵana saqtalǵan. Mádeniet apaiǵa ákesiniń urys dalasynda jaralanyp, taldyń túbinde qalǵany týraly maidanger joldastary aitqan. Budan ózge aqparat joq.
Batyrdyń jalǵyz qyzy ákesi qaitys bolǵan Reseidiń Rjev aýdanyna barýdy, sondai-aq ákesiniń súiegin týǵan jerine ákelip jerleýdi josparlap otyr. Osy rette, Qorǵaljyn aýdanynyń ákimdigi de batyrdy týǵan jerine jerleýge kómektesetindikterin aitýda.
Aita keteiik, Qorǵaljyn aýdanynan maidanǵa eki myńǵa jýyq sarbaz attandy. Olardyń ishinde tek 600 jaýynger ǵana úiine oraldy. Sońǵy maidanger 2015 jyly ómirden ótken.
