Foto: gov.kz
Qazaqstannyń Syrtqy ister ministrligi Reseidiń Ýst-Lýga eldi mekenindegi ýaqytsha jumysshylar lagerinde bolǵan janjalǵa qatysty resmi túsinikteme berdi, dep habarlaidy Ult.kz.
Áleýmettik jelilerde Leningrad oblysynda túsirilgen jappai tóbelestiń videosy tarap, oqiǵaǵa Qazaqstan azamattary da qatysqany týraly aqparat taraǵan edi. Video avtory janjalǵa qazaqstandyq jumysshylardyń da aralasqanyn aitqan.
Qazaqstandyq diplomattar bul oqiǵany «turmystyq janjal» dep baǵalap, tóbeleske Qazaqstan azamattarynyń qatysqanyn rastady. Qaqtyǵysqa qatysqan adamdar ustalyp, qazir tergeý amaldary júrgizilip jatyr.
SIM málimetinshe, qazaqstandyqtar arasynda aýyr jaraqat alǵandar joq.
«Qolda bar aqparatqa sáikes, Qazaqstan azamattarynyń eshqaisysy aýyr jaraqat alǵan joq jáne aýrýhanaǵa jatqyzýdy qajet etpeidi. Jergilikti jaǵdai turaqty ári quzyretti organdardyń baqylaýynda», – delingen resmi habarlamada.
Sankt-Peterbýrgtegi Qazaqstannyń Bas konsýldyǵy Resei biligimen turaqty bailanysta. Bas konsýl oqiǵa ornyna baryp, qazaqstandyqtarǵa qajetti konsýldyq jáne quqyqtyq kómek kórsetý úshin jaǵdaidy óz baqylaýyna alǵan.
Eske salaiyq, buǵan deiin Reseide qazaqstandyqtardyń qatysýymen jappai tóbeles bolyp, olardy politsiia alyp ketkeni týraly aqparat taraǵan bolatyn.
