kórneki sýret
Reseide tirkeýde bolmaǵan kólikter jalǵan reseilik nómirlermen elge kirgizilip jatyr. Bul týraly Ákimshilik politsiia komiteti tóraǵasynyń orynbasary Serik Túsipov vedomstvonyń aqparat alańynda ótken onlain brifingide aitty, dep habarlaidy QazAqparat.
«Ishki ister ministrligi sheteldik tirkeýi bar kólikterdi satyp alýdyń birneshe táýekeli bar ekenin eske salady.
Birinshiden, júrgizýshilerge BUU-nyń jol qozǵalysy týraly konventsiiasynyń talaptaryn saqtaý kerektigin eskergen jón. Ol boiynsha syrttan ákelingen kólikter Qazaqstan aýmaǵynda tirkeýsiz bir jyl ǵana júre alady. Bul ýaqyt bitkende olar el aýmaǵynan syrtqa shyǵarylýy kerek. Eger ol talap oryndalmasa, kólik iesine ákimshilik shara qoldanylady», - deidi komitet ókili.
Sondai-aq, ol shetelden ákelingen kólikti tekseýrsiz alýdyń sońy qylmystyq jaýapkershilikke aparýy múmkin ekenin eskertti.
«Taǵy bir eskeretin táýekel – qylmystyq qýdalaýǵa túsý táýekeli. Qazaqstandyq satyp alýshy shetelden ákelinetin kóliktiń qujattarynyń shynaiylyǵyn, urlanǵan nemese buǵatqa qoiylǵan kólik ekenin anyqtaý múmkindigi joq. Mundai táýekel shetelden ákelinetin kólikterdiń bárinde bolýy múmkin. Saldarynan aqshaǵa satyp alǵan kólik tárkilenip, alýshynyń ústinen de qylmystyq is qozǵalýy múmkin.
Mysaly tekserý kezinde osy aidyń basynan beri Óskemen, Petropavl, Semei qalalarynda tirkeý qujattary men nómiri qoldan jasalǵan 80 reseilik avtomashina anyqtaldy. Iaǵni, qazaqstandyq satyp alýshy kóligi Reseide tirkelgenine senimdi bolǵanymen, Resei Federatsiiasy keden qyzmetimen eshbir tirkeýde bolmaǵany anyqtaldy», - dedi Serik Túsipov.
Onyń aitýynsha, atalǵan kólikter boiynsha Resei Federatsiiasynyń Ishki ister ministrligine resmi saýal joldanǵan.
«Jaýap kelgen soń, atalǵan faktiler boiynsha zańnamada kórsetilgen protsessýaldyq áreketter qabyldanady», - deidi IIM ókili.
