Reseidiń shekaralas óńirlerinde qus tumaýynyń beleń alýyna bailanysty Soltústik Qazaqstan oblysynda aýrýdyń aldyn alýǵa baǵyttalǵan jumystar qyzdy, dep habarlaidy "Ult aqparat".
QR Aýyl sharýashylyǵy ministrligi veterinarlyq baqylaý jáne qadaǵalaý komitetiniń SQO aýmaqtyq inspektsiiasynyń málimetinshe, Reseide qus tumaýy órshigen. Jergilikti mamandar ondaǵy epizotikalyq jaǵdaidy baqylaýda ustap otyr. Búginge deiin kórshi elde qus aýrýy boiynsha jaisyz aimaq retinde 11 eldi meken esepke alynsa, sonyń 7-ýinde jabaiy qustar qyrylǵan. Onyń ishinde óńirmen shekaralas Túmen oblysy da bar. Bul aimaqta qus tumaýynyń eki jaǵdaiy tirkeldi. Qaýipti dert jabaiy jáne úi qustarynan da anyqtalǵan.
«Qaýipti aýrý bizdiń óńirge de kelýi múmkin. Ókinishke orai ótken jyly da qus tumaýy bizge Reseiden kelgen edi. Byltyrǵy epizootikalyq jaǵdaidy eskere otyryp, aldyn alý jumystaryn júrgizip jatyrmyz. Aýrýmen kúresýdiń tiimdi tásili - vaktsinatsiia. Jyl basynan oblys boiynsha turǵyndardyń 556 myń qusyna ekpe egildi», - deidi QR Aýyl sharýashylyǵy ministrligi veterinarlyq baqylaý jáne qadaǵalaý komitetiniń SQO aýmaqtyq inspektsiiasynyń basshysy Marat Ibraev.
SQO-da jyl sońyna deiin taǵy 554 myń qusqa vaktsina salý josparlanǵan. Al qus fabrikalary vaktsinatsiiany óz qarajatyna júrgizýge mindetti. Kásiporyndarda immýndaý jumysy aiaqtaldy. Bazarlar men saýda oryndary baqylaýǵa alynǵan.
«Ekinshi jarty jyldyqqa josparlanǵan vaktsina óńirge qazir kele jatyr. Bir ailyq balapandarǵa deiin ekpe egemiz. Qazirgi ýaqytta Túmen oblysymymen shekara beketi jabyq. Qalǵan beketterimizde bizdiń veterinar mamandarymyz jumys isteidi. Jalpy jyl basynan veterinarlyq shekteýlerdi buzýǵa qatysty 4 fakti anyqtaldy. Reseiden ákele jatqan ónim shekaradan kirgizilmedi», - deidi Marat Ibraev.
Byltyr SQO-da qus tumaýy 12 aýdannyń 54 mekeninde tirkeldi. Jalpy óńirde 1,5 mln qus qyryldy. Biyl maýsymda Aiyrtaý aýdanynda jabaiy qustarda aýrý anyqtalǵan edi. Veterinarlar qus tumaýynan ólgen 104 qusty jinap alyp, joidy.
