Batys Qazaqstan oblysynda Reseide koronavirýstyń órshýine bailanysty shekarada sanitarlyq-karantindik talaptar kúsheitildi, dep habarlaidy QazAqparat.
Bul týraly oblys ákimi Ǵali Esqalievtiń tóraǵalyq etýimen ótken óńirlik jedel shtab otyrysynda BQO sanitarlyq-epidemiologiialyq baqylaý departamentiniń basshysy Muhamǵali Aryspaev málim etti.
Onyń aitýynsha, sońǵy táýlikte Reseide 85 óńirde 34 325 naýqas tirkelgen.
Sonyń ishinde Batys Qazaqstanmen shektesetin Samara oblysynda - 915, Volgogradta - 382, Orynborda - 399, Saratovta 408 adamnan koronavirýs anyqtaldy.
«Kúni búgin indetke tosqaýyl qoiý maqsatynda shekaradaǵy 4 karantindik-sanitarlyq bekette 12 epidemiolog táýlik boiy jumys istep jatyr», - dedi M.Aryspaev.
Onyń sózine qaraǵanda, 1 qazannan beri anyqtamasyz ótken 673 jolaýshynyń bireýinen indet tabyldy. Halyqaralyq júk tasymalymen ainalysatyn 1946 júrgizýshi anyqtamasyz ótken. Sonyń ekeýi koronavirýs juqtyrǵan bolyp shyqty.
