Reseide sońǵy táýlikte koronavirýs infektsiiasynan kóz jumǵandar sany 936 adamǵa jetti. Bul pandemiia kezindegi eń joǵarǵy kórsetkish, dep habarlaidy QazAqparat.
Seisenbi kúni RF vitse-premeri Tatiana Golikova úkimet múshelerimen jinalysta osy jyldyń qyrkúiek aiynda KVI-ge shaldyqqandar sany 31 protsentke jetip, 100 myń adamǵa shaqqanda 88 jaǵdaidy quraǵanyn habarlaǵan bolatyn.
«Bes aptadaǵy ortasha aptalyq kórsetkish 100 myń turǵynǵa shaqqanda 96,9 adamdy qurady. Bul ótken jylmen salystyrǵanda 3,1 ese kóp», - dedi Tatiana Golikova.
Sondai-aq, ol profilaktika aiasynda jalpy 47,4 mln reseilik vaktsinanyń birinshi komponentin alǵanyn, al 42,2 mln adam tolyqtai ekpe ektirgenin aitty. Aýyrǵannan keiin jáne qaita vaktsina alǵandar sany – 1,9 mln adam.
Ujymdyq immýnitetke jetý úshin taǵy da 35,9 mln adam alǵashqy ekpe alýy tiis. Sońǵy táýlikte Reseidiń barlyq óńirinde 27 246 adam koronavirýs juqtyrǵan.
