Resei Tergeý komitetiniń tóraǵasy Aleksandr Bastrykin qazaqstandyq stýdent Tomiris Baisafanyń ólimine qatysty qylmystyq isti tergeý barysynda anyqtalǵan barlyq mán-jaidy baiandaýdy tapsyrdy, - dep habarlaidy Tengrinews.kz.
Resei Tergeý komiteti málimetinshe, 2018 jyly qaitys bolǵan MMHQI stýdentiniń anasy áleýmettik jelide Resei Tergeý komitetiniń tóraǵasy Aleksandr Bastrykinge institýt prorektoryna qatysty qylmystyq is qozǵaý týraly ótinish bildirdi.
"Áiel ýniversitet basshysy qyzdyń ólimine kináli jigittiń otbasymen tanys bolǵandyqtan, qylmysty jasyrýǵa yqpal etkenin aitady. Buǵan deiin alqabi jigitke aqtaý úkimin shyǵarǵan bolatyn, keiin Máskeýdiń Nikýlin soty ony aqtaǵan. Jábirlenýshi tarap apelliatsiialyq shaǵym jazdy, ótken aidyń sońynda is Máskeý qalalyq sotyna jiberildi", - dedi vedomstvo ókili.
Bastrykin óziniń qolastyndaǵylarǵa tergeýdiń barlyq kezeńin baiandaýdy, qyzdyń ólimine ákelgen oqiǵany zerttep, naqty esep berýdi tapsyrdy.
Tomiris Baisafanyń anasy Tengrinews.kz redaktsiiasyna bergen suhbatynda is boiynsha jańa derekter baryn aitqan bolatyn.
Buǵan deiin aiyptalýshyny alqabiler qyzdyń ólimine kinási dáleldenbedi dep aqtap shyǵarǵan bolatyn. Keiin Máskeý soty Mýrtýzali Medjidovti Tomiris Baisafany óltirdi dep taǵylǵan aiyptan aqtaǵany belgili boldy.
Eske salaiyq, 2018 jyldyń 13 sáýirinde MMHQI Halyqaralyq ekonomikalyq qatynastar kafedrasynyń tórtinshi kýrs stýdenti Tomiris Baisafa jumbaq jaǵdaida JOO-nyń tórtinshi qabatynyń terezesinen qulap ketken. Aýyr jaraqat alyp, kóp qan joǵaltqan. Sol jyldyń 3 mamyrynda Tomiris Sklifosovskii ǵylymi-zertteý institýtynda qaitys bolǵan.
Tomiris Baisafany óltirdi degen kúdikpen Daǵystannyń burynǵy premer-ministriniń uly Mýrtýzali Medjidov ustalǵan edi.
