Mádeniet jáne sport ministri Aqtoty Raiymqulova fonogrammamen án aitýǵa tyiym salý bastamasyna qatysty pikir bildirdi, dep habarlaidy QazAqparat.
«Shynynda da, keiingi kezde qazaqstandyq qoǵamda otandyq estradaǵa qatysty suraqtar kóp týyndap jatyr. Bul rette mańyzdy máseleniń biri – fonogrammany qoldaný. Fonogrammaǵa qatysty syn sóz aitatyn halyqtyń qarasy mol. Áleýmettik jelilerde de mundai synnyń kóp ekenin baiqaimyz. Sol sebepti bul máseleni sheshý úshin Mádeniet jáne sport ministrligi «Qazaqstan Respýblikasynyń mádenieti týraly» Zańǵa ózgerister men tolyqtyrýlar engizip, Parlament Májilisiniń qaraýyna jiberdi», - dedi Aqtoty Raiymqulova OKQ alańy arqyly halyq aldynda esep berý kezdesýinde.
Ministrdiń aitýynsha, zań jobasynyń úkimettik nusqasynda «fonogrammany paidalaný tártibi» (televidenie men radiodan basqa jerdiń bárinde tyiym salý) týraly norma da bar.
«Árbir zań jobasy múddeli memlekettik organdary men «Atameken» UKP maquldaýynan ótedi. Biz zań jobasy arqyly aýditoriiaǵa fonogrammanyń paidalanylatyny týraly aldyn ala habarlaý tártibin usynamyz. Shynynda da bul másele ózekti ekenin aitqym keledi. Biz estradada jumys isteitin sýbektilerdiń múddesin eskere otyryp, ony jan-jaqty talqylaýymyz kerek. Ekinshi jaǵynan tutynýshynyń múddesin de qorǵaýǵa tiispiz. Tyńdarmanǵa aldyn ala habarlaý kerek. Osylaisha halyq jandy daýystaǵy ándi tyńdaǵysy kele me, álde fonogrammaǵa kelise me, ózi sheshedi», - dedi ol.
