QR Ishki ister ministri Erlan Turǵymbaev Táýelsizdiktiń 30 jyldyǵyna orai jasalatyn raqymshylyq aiasynda kámeletke tolmaǵan sottalýshylar nege qamaýdan bosatylmaitynyn túsindirdi, dep habarlaidy QazAqparat tilshisi.
Parlament Májilisiniń plenarlyq otyrysynda «Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly» zań jobasyn Ishki ister ministri Erlan Turǵymbaev tanystyrǵan edi. Sonyń barysynda depýtat Janna Telpekbaeva kámeletke tolmaǵan sottalýshylarǵa raqymshylyq jasaý máselesi boiynsha suraq qoidy.
«Búginde bizde Almaty qalasynda kámeleket tolmaǵandardyń jazasyn óteýge arnalǵan jalǵyz mekeme bar. Onda kámeletke tolmaǵan 52 jas qamaýda otyr. Olardyń bári asa aýyr jáne aýyr qylmys jasaǵany úshin sottalǵan. Sondyqtan olardyń eshbiri raqymshylyqqa jatpaidy. Tek kámeletke tolmaǵan 12 sottalýshynyń tártibi men jasaǵan qylmysynyń aýyrlyǵyna bailanysty jaza merzimi jartylai nemese úshten birine qysqartylady. Olardyń eshbiri qamaý ornynan bosatylmaidy», - dedi ministr.
Aita keteiik, Májilis atalmysh zań jobasyn maquldady.
«Biyl egemen elimiz úshin eleýli kezeń. Osyǵan orai Memleket basshysynyń tapsyrmasymen Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly zań jobasy ázirlenip, búgin maquldanyp otyr. Árine, raqymshylyq memleket tarapynan jasalyp otyrǵan izgi jáne senim sharasy. Sondyqtan bul joly da aldymen memlekettiń jáne azamattardyń qaýipsizdigine qaýip keltirmeitin qylmys jasaǵandar bosatylady. Sonymen birge osy zań jobasynda alǵash ret áleýmettik tómen topqa erekshe nazar aýdarylyp otyr», - dedi Májilis tóraǵasy Nurlan Nyǵmatýlin.
