«Qazaqstan temir joly» ulttyq kompaniiasy Almaty vagon paidalaný deposynyń direktorynyń qamaýǵa alynǵanyn rastady, dep habarlaidy ult.kz.
Buǵan deiin birqatar BAQ-ta «Almaty vagon paidalaný deposy» filialy – «Tasymaldaý protsesi direktsiiasynyń» basshysy ustalǵany týraly aqparat taraǵan bolatyn. Málimetterge sáikes, ol 110 million teńge kóleminde para aldy degen kúdikpen jumys kabinetinde qolǵa túsken.
QTJ málimetinshe, kásiporyn direktory 9 sáýirde qylmystyq is aiasynda ustalǵan. Tergeý onyń 2024–2025 jyldar aralyǵyndaǵy qyzmet kezeńin qamtidy. Sot kúdiktige qatysty qamaýda ustaý túrindegi bultartpaý sharasyn sanktsiialady.
«Qazaqstan temir joly» UK» AQ sybailas jemqorlyqtyń kez kelgen kórinisine múldem tózbeýshilik qaǵidatyn ustanatynyn málimdedi. Kompaniia tergeý organdaryna qajetti aqparat pen materialdardy usynyp, istiń barlyq mán-jaiyn anyqtaýǵa jan-jaqty qoldaý kórsetip jatqanyn habarlady.
Sondai-aq depoda ishki tekseris bastalǵan. Onyń aiasynda yqtimal zańbuzýshylyqtardyń sebepteri men oǵan jol bergen jaǵdailar anyqtalmaq. Tergeý aiaqtalǵanǵa deiin QTJ ókilderi qosymsha túsinikteme bermeitinin jetkizdi.
Eske salaiyq, 28 mamyrda Senat sybailas jemqorlyqqa qarsy is-qimyl máseleleri boiynsha jańa zańdy maquldaǵan edi. Qujatqa sáikes, endi para berýdi usynǵany nemese ýáde etkeni úshin de jaýapkershilik qarastyrylǵan.
