QR arqyly táýligine 400 myń adam tekseriledi. Bul týraly búgin Úkimet otyrysynda «Atameken» ulttyq kásipkerler palatasy basqarma tóraǵasynyń birinshi orynbasary Nariman Ábilshaiyqov aitty, dep habarlaidy QazAqparat.
«Búgingi tańda «Ashyq» qosymshasyn 4 mln-nan astam qoldanýshy paidalanady. 12 sáýirden beri ózin-ózi oqshaýlaý rejimin buzǵan 46 myń adam anyqtaldy. Olardyń 29 myńnan astamy «qyzyl» jáne 16 myńy «sary» túste. Óz mártebesin onlain rejimde tekserý úshin testilik QR jumys isteidi. Ol arqyly táýligine 400 myńdai adam tekseriledi. Negizinde onyń 1,5-2 paiyzy oń nátijeli PTR test kórsetip otyr. Bul óz kezeginde epidemiianyń taralýyna jol bermeidi», - dedi Nariman Ábilshaiyqov.
Onyń atap ótýinshe, shilde aiynyń basynan bastap, saýda ortalyqtary jáne bazarlar eriktiler retinde jobaǵa kirip, keiinnen jobanyń tolyqqandy qatysýshysyna ainaldy. 200 myńǵa jýyq saýda sýbektileriniń qosylýy arqyly jobanyń aýqymy ulǵaidy jáne «karantindi buzýshylardy» anyqtaý 10 esege ósti.
«Osy jyldyń 29 shildesinen bastap jobaǵa qosylatyndar úshin QR kodty alý tártibi jeńildetilip, protsester avtomattandyryldy. Nátijesinde, merzimi 9 kúnnen 10 minýtqa deiin qysqartyldy. Buryn 3 ai ishinde jobaǵa aptasyna 1000-ǵa jýyq sýbekt qosylsa, qazir olardyń sany 100 myńǵa deiin ósti. Osylaisha, 2 apta ishinde bul 5 esege artty. Jobaǵa qosylýda Nur-Sultan, Almaty, Shymkent qalalary, Qaraǵandy jáne Atyraý oblystary belsendilik tanytyp otyr. Birinshi kezekte bul óńirlerdiń «qońyr-qyzyl» aimaqqa kirýine bailanysty, «Ashyq» jobasyna qatysý olardyń jumys jasaýyna múmkindik beredi», - dedi ol.
