Qostanai oblysynyń turǵyny ekinshi qabatta turatyn qyzyna kúndelikti syrtqa shyǵýǵa múmkindik beretin arnaiy lift ornatqan, dep habarlaidy ult.kz Zakon.kz saityna silteme jasap.
Qazaqstandyq Samigolla Ǵaniev tserebraldy sal aýrýy (DTsP) diagnozy bar 33 jastaǵy qyzy Gúlbergen úshin úiiniń ekinshi qabatynan kóshege túsetin jeke lift jasatty.
Gúlbergen – otbasyndaǵy bes balanyń úlkeni. Buǵan deiin ony anasy arbaǵa otyrǵyzyp, baspaldaqpen kóterip-túsiretin. Alaida kezekti serýennen keiin qyzyn ekinshi qabatqa kóterip kele jatqanda anasynyń beli aýyryp qalǵan.
Osydan keiin ákesi qyzyna yńǵaily lift ornatýdy oilaǵan.
«Áielim qyzymyzdy ekinshi qabatqa kóterip kele jatqanda beli aýyryp qaldy. Sodan qandai da bir lift oilap tabýdy surady. Qazaqstannyń barlyq jerinen izdei bastadym. Rýdnyi qalasyna shyqtym. Bastapqyda mundai qurylǵy jasamaitynyn aitty. Keiin qaita habarlasyp, tapsyryspen jasap bere alatynyn jetkizdi», – dedi kópbalaly áke.
Arnaiy kótergishtiń júk kóterý qabileti – 250 keli. Onyń biiktigi 3 metr 80 santimetrdi quraidy. Qurylǵy beinekameramen, jaryqtandyrý júiesimen jáne kodty qulyppen jabdyqtalǵan.
Liftti jasaýǵa, tasymaldaýǵa jáne ornatýǵa bir aiǵa jetpeitin ýaqyt ketken. Otbasy bul jumysqa shamamen 4 mln teńge jumsaǵan.
Ákesi munymen de toqtamai, qyzyna úiden shyǵýdy barynsha yńǵaily etý úshin óz bólmesiniń tusyna arnaiy balkon da salǵan.
Endi Gúlbergen kóshege kún saiyn ózine arnalǵan lift arqyly shyǵa alady.
