Otandyq QazVac vaktsinasynyń úshinshi kezeń boiynsha klinikalyq zertteý jumysy aiaqtaldy.
Bul týraly Biologiialyq qaýipsizdik problemalarynyń ǵylymi-zertteý institýtynyń bas direktory, koronavirýsqa qarsy QazVac qazaqstandyq vaktsinanyń avtory Kúnsulý Zakaria málim etti, dep habarlaidy QazAqparat tilshisi.
«Búginde úshinshi kezeń boiynsha barlyq klinikalyq zertteý aiaqtalyp, 9 shilde kúni sońǵy taldaý nátijesi alyndy. Shildeniń sońyna deiin taldaý nátijesi taǵy bir óńdelip, málimetterdiń statistikasy jasaldy. Bul jumysqa 3 myń adam qatysyp otyr. Sondai-aq, shildeniń sońynda klinikalyq zertteýdiń qorytyndy esebi ázirlendi. Qazirgi kúni qorytyndy esep Dárilik zattar men meditsinalyq buiymdardy saraptaý ulttyq ortalyǵynyń saraptaýynan ótip jatyr, onyń nátijesi áli kelgen joq. Degenmen bizdiń ázirlegen esepke qarap, alǵash otandyq vaktsinany klinikalyq zertteý sátti júrgizildi dep aitýǵa bolady», - dedi Kúnsulý Zakaria OKQ-de ótken baspasóz máslihatynda.
Sondai-aq, otandyq ǵalym QazVac-tyń úshinshi kezeńine qatysty qorytyndy esep oń baǵa berilgen jaǵdaida otandyq vaktsina týraly ǵylymi maqalalardyń jaryq kóretinin aitty.
«Eger QazVac-tyń úshinshi kezeńi boiynsha barlyq klinikalyq zertteý esebin Dárilik zattar men meditsinalyq buiymdardy saraptaý ulttyq ortalyǵy maquldaǵan jaǵdaida biz qazaqstandyq vaktsina týraly kópke tanymal jýrnaldarǵa maqala jariia etpekpiz. Maqsat- otandyq ǵylymnyń jetistigin dáripteý. Ázirge qandai jýrnal jáne maqalanyń qai ýaqytta jariialanatyny belgisiz», - deidi ol.
