Biologiialyq qaýipsizdik máseleleri ǵylymi-zertteý institýtynyń bas direktory Kúnsulý Zákariia QazVac vaktsinasynyń tiimdiligi týraly pikir bildirdi, dep habarlaidy QazAqparat.
«QazVac vaktsinasyn salǵan aǵzanyń immýndyq reaktsiiasy qandai deńgeide bolatynyn tiri virýsty beitaraptandyrý reaktsiiasy aiǵaqtai alady. 3244 adamǵa júrgizilgen úsh fazaly klinikalyq zertteý men 200-den astam eriktige hattamadan tys jasalǵan zertteý QazVac vaktsinasy salynǵan adamdardyń 95%-dan astamynda SARS-CoV-2 virýsyna virýs beitaraptandyratyn antidene qalyptasqanyn kórsetti», - deidi maman.
Vaktsina jasaýshy toptyń jetekshisi Nur-Sultan qalasynda jasalǵan zertteýge qarap QazVac-tyń tiimdiligine birjaqty baǵa berýge bolmaitynyn eskertip otyr.
«Al Nur-Sultan qalasyndaǵy zerthanada júrgizilgen synaq immýndyq-fermenttik taldaý arqyly júrgizildi. Mundai tásilmen vaktsinatsiiadan keiingi antideneni virýs juqtyryp aýyrǵannan keiin qalyptasatyn antideneden ajyratý múmkin emes. Qazir el ishinde simptomsyz koronavirýspen aýyrý nátijesinde paida bolǵan antideneleri bar adamdar kóp. Sondyqtan immýndyq-fermenttik taldaý málimetteri boiynsha vaktsinatsiia nátijelerin jáne onyń tiimdiligin baǵalaý durys emes», - deidi ǵalym.
Kúnsulý Zákariia Dúniejúzilik densaýlyq saqtaý uiymy moiyndaǵan jetekshi vaktsinalardyń ózi týraly túrli zertteýlerdiń árkelki nátije kórsetkenin eske saldy.
«Sońǵy jariialanǵan derekterdiń birinde Qytaida jasalǵan vaktsinanyń tiimdiligi 52%-dan aspaitynyn, al Pfizer vaktsinasynyń tiimdiligi 64% dep túzetildi. Bul kórsetkish naqtylaýdy qajet etedi. Degenmen zerthanalyq testileý qorytyndysy boiynsha bul vaktsinalardyń immýnitet qalyptastyrý qabileti 90-95 paiyzdan joǵary dep baǵalanǵan bolatyn. Jariialanyp jatqan nátijeler zerttelgen vaktsinalardyń tiimdiligin naqty kórsete almaidy dep esepteimiz. Sondai-aq, zertteýler vaktsina egilgennen keiin qandai merzimde júrgizilgeni belgisiz kúiinde qalyp otyr», - deidi ortalyqtyń bas direktory.
Maman QazVac vaktsinasyna jasalǵan synaqtyń III fazasy ekpeniń tiimdiligin kórsetkenin aitady.
«Vaktsinany baǵalaý qorytyndysy 79% jáne odan joǵary bolsa, bul barlyq vaktsinalar úshin, sonyń ishinde attyń jaly, túieniń qomynda shyǵarylyp jatqan QazVac úshin óte jaqsy nátije degen sóz.
QazVac vaktsinasynyń COVID-19-dyń aldyn alýǵa tiimdi ekenin klinikalyq zertteýlerdiń III fazasy kórsetti. QazVac vaktsinasynan keiin paida bolǵan antidenelerdiń virýsty beitaraptandyrý deńgeii Qytai shyǵarǵan vaktsinaǵa (Hayat-Vax) qaraǵanda edáýir joǵary jáne Spýtnik-V vaktsinasynan 1-2 saty ǵana tómen. Iaǵni, QazVac jáne Spýtnik-V vaktsinasynan keiin paida bolǵan antideneler virýstyń britandyq jáne úndilik shtamdarynan senimdi qorǵaidy. Al Hayat-Vax-tyń qabileti bul turǵyda óte álsiz», - deidi ǵalym.
