QR Densaýlyq saqtaý birinshi vitse-ministri Marat Shoranov QazVac vaktsinasyna júrgizilgen synaqtyń úshinshi kezeń esebi qandai jaǵdaida daiyn bolatynyn aitty, dep habarlaidy QazAqparat.
«Úshinshi kezeń boiynsha esepke keletin bolsaq, shyn máninde dárilik zattardy saraptaý ortalyǵy bul qujattardy qarap jatyr jáne qaǵazdar tolyq talapqa sai bolǵan kezde oń qorytyndysyn beredi. Bul jumysqa ǵalymdardyń úlken saraptamalyq toby qatysady. Olar zertteý nátijesi qoiylatyn talaptarǵa qanshalyqty sáikes ekenin qaraidy», - dedi Marat Shoranov ortalyq kommýnikatsiialar qyzmetinde ótken brifingide.
Onyń sózine qaraǵanda, qujattar búkil talaptarǵa sai bolsa, synaq qorytyndysy týraly sheshim shyǵarý úshin eki apta ketýi múmkin.
«Qujattardyń tolyq paketi bolsa, jaqyn arada tiisti qorytyndy beriledi. Barlyq pysyqtalǵan materialdardy alǵannan keiin qujattar zerdelenip, tiisti sheshim shyǵarylady. Ol úshin buǵan deiin aitylǵan nusqaýlar oryndalyp, kemshilikter túzetilýi kerek», - dedi Marat Shoranov.
