QR Bilim jáne ǵylym ministrligine qarasty Biologiialyq qaýipsizdik problemalary ǵylymi-zertteý institýtynyń zerthana meńgerýshisi Nýrika Asanjanova koronavirýsqa qarsy qazaqstandyq QazVac vaktsinasynyń 3 negizgi artyqshylyǵyn atady, dep habarlaidy QazAqparat.
«Birinshiden, vaktsinany saqtaý talaptary qarapaiym. Kádimgi tońazytqyshtar. Tasymaldaý jáne saqtaý kezinde ustap turý qiyn bolatyn minýs 20, ne minýs 70 gradýsta qatyrýdyń qajeti joq.
Ekinshiden, vaktsina – qaýipsiz. Sebebi ol inaktivtendirilgen, basqasha aitqanda «óltirilgen».
Jáne úshinshiden, tiimdiligi joǵary. Ózge tehnologiialarmen salystyratyn bolsaq, bizdiń vaktsina tutas virýstan jasalady. Qarapaiym tilmen aitsaq, vaktsinalanǵan aǵzaǵa virýs engen jaǵdaida, antideneler aldyn ala saq turady. Syrqattarmen tiimdi kúresýge múmkindik beretin immýnologiialyq jady iske qosylady», - dedi Nýrika Asanjanova «20:21» jobasynyń efirinde.
