Qazaqstandyq ǵalym, qoǵam qairatkeri, filologiia ǵylymdarynyń doktory, professor, Qazaqstannyń eńbek sińirgen qairatkeri, «Parasat» ordeniniń jáne «Til janashyry» qurmet belgisiniń iegeri Asyly Osman Quryltai sailaýyna qatysyp, óz tańdaýyn jasady.
Asyly Osman №64 sailaý ýchaskesine alǵashqylardyń biri bolyp kelip, daýys berdi. El ómirindegi mańyzdy saiasi naýqanǵa belsendi qatysqan ardaqty ustaz, til janashyry óz azamattyq ustanymyn bildirip, sailaýdyń mańyzdylyǵyna toqtaldy.
«Búgingi jiynnyń jóni bólek. Bul – úlken toi. Óitkeni «Quryltai» dep birinshi atalyp kelgenine ózim erekshe baǵa beremin. Men mundai kezde úide jatyp qalmai, kelip, elimizdi asqaqtatýǵa óz úlesimdi qosýymyz kerek dep esepteimin. Sondyqtan eń aldymen daýys berip, óz únimdi qosýǵa keldim. Qazaqstannyń topyraǵyn basyp, sýyn iship júrgen jannyń barlyǵy sailaýǵa qatysyp, óz tańdaýyn jasaǵany durys.
Bul Quryltaidyń jóni bólek. Quryltai – sonaý ata-babalarymyzdan kele jatqan, mańyzdy máselelerdi sheshý úshin eldiń belgili tulǵalarynyń basyn qosatyn, memlekettiń qandai dárejede bolýy kerektigine qatysty máselelerdi talqylaityn basqosý. Sondyqtan búgingi Memleket basshysynyń «Quryltai» dep ataǵanyna erekshe rizashylyǵymdy bildiremin. Óitkeni Quryltai – ata-babalarymyzdan kele jatqan úlken dástúr. Osy bastama sátti bolsyn! Ár azamatty búgingi saiasi mańyzdy oqiǵaǵa óz úlesin qosyp, óz daýsyn berýge shaqyramyn», – dedi Asyly Osman.
Asyly apamyz eldiń birligi men turaqtylyǵy osyndai saiasi mańyzdy oqiǵa kezinde aiqyndalatynyn atap ótti. Sondai-aq ol jastardyń el bolashaǵyna beijai qaramai, qoǵamdyq jumystarǵa belsendi aralasýy mańyzdy ekenin aitty.
«Men árbir sailaý saiyn elimdi, halqymdy, jerimdi súigendikten, halqymdy syilaǵandyqtan, el aldyna birinshi bolyp kelip, óz únimdi qosýǵa tyrysamyn. Mundai oqiǵa kúnde bolyp jatqan joq. Osyndai mańyzdy kezeńderde bizdiń birligimiz de, dostyǵymyz da, otansúigishtigimiz ben ózara túsinistigimiz de arta túsedi», – dedi qoǵam qairatkeri.
