«Qazgidromet» RMK sinoptikteri 29 maýsymǵa arnalǵan daýyldy eskertý jariialady. Eldiń basym bóliginde aýa raiy kúrt qubylyp, kei óńirlerde nóser jańbyr men burshaq jaýsa, basqa aimaqtarda aýa temperatýrasy +40 gradýsqa deiin kóteriledi, dep habarlaidy ult.kz.
Astana, Almaty jáne Shymkentte aýa raiy qandai bolady?
Astanada kún raiy kúrt nasharlaidy. Sinoptikter jańbyr, kúndiz kei ýaqytta qatty nóser, naizaǵai, burshaq jáne ekpindi jel bolady dep boljaidy. Jeldiń ekpini sekýndyna 15–20 metrge deiin jetedi.
Almatyda kúndiz aýa temperatýrasy +35...+36 gradýsqa deiin kóteriledi. Naizaǵai oinap, jeldiń ekpini 15–18 m/s bolady. Ile Alataýynyń taýly aimaqtarynda ótkinshi jańbyr jaýyp, naizaǵai kútiledi. Qalada joǵary órt qaýpi saqtalady.
Shymkentte ótkinshi jańbyr jaýyp, naizaǵai oinaidy. Jeldiń ekpini 15–20 m/s-qa deiin kúsheiedi.
Qai óńirlerde qolaisyz aýa raiy kútiledi?
Elimizdiń kóptegen oblystarynda nóser jańbyr, naizaǵai, burshaq jáne qatty jel boljanyp otyr.
Ulytaý jáne Mańǵystaý oblystarynda – jeldiń ekpini 23–28 m/s-qa deiin jetedi. Mańǵystaýda qatty jańbyr men burshaq jaýady.
Soltústik Qazaqstan, Jambyl jáne Abai oblystarynda – jeldiń ekpini 25 m/s bolady.
Qyzylorda oblysynda – qatty jelmen qatar shańdy daýyl kútiledi.
Sondai-aq Aqtóbe, Qostanai, Batys Qazaqstan, Atyraý, Aqmola, Pavlodar, Qaraǵandy jáne Túrkistan oblystarynda nóser jańbyr, burshaq jáne daýyldy jel boljanyp otyr.
Kei óńirlerde +40 gradýsqa deiin ystyq bolady
Eldiń shyǵysynda, ońtústiginde jáne ortalyǵynda aptap ystyq saqtalady.
Aýa temperatýrasy Almaty oblysynyń soltústiginde, Jetisý oblysynda, Pavlodar, Shyǵys Qazaqstan jáne Abai oblystarynyń ońtústiginde, sondai-aq Qaraǵandy oblysynyń shyǵysynda +40 gradýsqa deiin kóteriledi.
Al Almaty, Pavlodar, Qaraǵandy, Shyǵys Qazaqstan jáne Jetisý oblystarynda +35...+38 gradýs ystyq kútiledi.
Órt qaýpi joǵary
Sinoptikterdiń málimetinshe, aptap ystyqqa bailanysty Qazaqstannyń basym bóliginde joǵary jáne tótenshe órt qaýpi saqtalady. Osyǵan bailanysty turǵyndarǵa tabiǵat aiasynda otpen jumys isteýde barynsha saq bolý usynylady.
