Qazaqstanda halyqtyń sportqa qyzyǵýshylyǵy artyp keledi. 2026 jyly úsh jastan asqan turǵyndardyń 47,7%-y dene shynyqtyrýmen nemese sportpen ainalysqan. Bul týraly Ulttyq statistika biýrosynyń 12 myń úi sharýashylyǵy arasynda júrgizgen iriktemeli zertteýinde aityldy, dep habarlaidy ult.kz.
2025 jylmen salystyrǵanda sportpen ainalysatyndardyń úlesi 1,2 paiyzdyq tarmaqqa ósken. Byltyr bul kórsetkish 46,5% bolǵan.
Qazaqstandyqtar sportpen qalai ainalysady?
Zertteý nátijesine sáikes:
- 19,2% – bos ýaqytynda óz betinshe jattyǵady;
- 28,1% – bilim berý uiymdaryndaǵy sporttyq sabaqtarǵa qatysady;
- 0,4% – sportpen kásibi túrde ainalysady.
Qala turǵyndarynyń arasynda sportpen ainalysatyndardyń úlesi 49,3% bolsa, aýyl turǵyndarynda bul kórsetkish 45% bolǵan.
Qalalyqtar bos ýaqytynda óz betinshe jattyǵýǵa da kóbirek beiim. Qala turǵyndarynyń 22,2%-y sportpen óz betinshe ainalyssa, aýylda bul kórsetkish 13,7%.
Eń belsendi jas toby – 36-48 jastaǵylar
Óz betinshe dene shynyqtyrýmen jáne sportpen ainalysatyndardyń arasynda eń joǵary kórsetkish 36-48 jastaǵy adamdarda – 28,4%.
Odan keiin:
- 17-28 jas – 18,6%;
- 58 jastan joǵary – 16,6%;
- 29-35 jas – 16%;
- 49-57 jas – 15,4%.
Óńirler boiynsha kórsetkishter jas ereksheligine qarai ártúrli.
Máselen, 17-28 jastaǵylar arasynda óz betinshe sportpen ainalysatyndardyń úlesi Mańǵystaý oblysynda 48,1%, Qyzylorda oblysynda 31%, Aqtóbe jáne Ulytaý oblystarynda 28,9% bolǵan.
Al 36-48 jastaǵy turǵyndar arasynda eń joǵary kórsetkish Pavlodarda (42,6%), Jambyl oblysynda (40,8%) jáne Shymkentte (39,2%) tirkelgen.
58 jastan asqandar arasynda Soltústik Qazaqstan (32,7%), Qostanai oblystary (32,2%) jáne Almaty qalasy (30,3%) alda tur.
Erler men áielderdiń kórsetkishi qandai?
Óz betinshe sportpen ainalysatyndardyń arasynda erler men áielderdiń úlesi shamalas: 51% – erler, 49% – áielder.
Erler arasynda óz betinshe jattyǵatyndardyń eń joǵary úlesi 36-48 jastaǵylarǵa tiesili – 14,4%. Odan keiin 17-28 jas (11,3%) jáne 29-35 jas (9,1%) aralyǵyndaǵy erler keledi.
Áielder arasynda da 36-48 jastaǵylar alda – 13,9%. Sonymen qatar 58 jastan asqan áielderdiń úlesi 12,3% bolǵan.
Qyzyǵy, qala men aýylda erler men áielderdiń kórsetkishteri aitarlyqtai erekshelenedi. Qalada áielderdiń 43,9%-y, erlerdiń 34,5%-y óz betinshe dene belsendiligimen ainalysady. Al aýyldyq jerde kerisinshe, erlerdiń úlesi 54,6%, áielderdiki 32,7% bolǵan.
Erler sport sektsiiasyna jiirek barady
Óz betinshe jattyǵý jasaý dene belsendiliginiń negizgi túri bolyp otyr. Erlerdiń 39,7%-y, áielderdiń 41%-y uiymdastyrylǵan sabaqtarǵa qatyspai, ózdiginen jattyǵýdy tańdaidy.
Al sport sektsiialary men trenajer zaldaryn qosa alǵanda, uiymdastyrylǵan sporttyq sabaqtarǵa erlerdiń 8,7%-y jáne áielderdiń 6,6%-y qatysady.
Uiymdastyrylǵan sabaqtarǵa qatysyp, sonymen qatar óz betinshe jattyǵatyndardyń úlesi erler arasynda 2,5%, áielder arasynda 1,5% bolǵan.
Óz betinshe sportpen ainalysatyn erlerdiń úlesi Jambyl (68,5%), Túrkistan (66,2%), Qyzylorda (60,6%) oblystarynda jáne Jetisýda (56,9%) joǵary.
Al áielder arasynda eń joǵary kórsetkish Shymkentte – 53,8%, Astanada – 52,1%, Aqmola oblysynda – 49,7% jáne Shyǵys Qazaqstan oblysynda – 46,3% tirkelgen.
Uiymdastyrylǵan sporttyq sabaqtarǵa erler arasynda Mańǵystaý (25,3%), Ulytaý (21,9%), Qaraǵandy (21,7%) jáne Almaty (21%) oblystarynyń turǵyndary kóbirek qatysady.
Áielder arasynda bul kórsetkish Soltústik Qazaqstan oblysynda (21,2%), Pavlodarda (17,5%), Almatyda (16,4%) jáne Qaraǵandy oblysynda (16%) joǵary.
