Búgin, 23 tamyzda, Qazaqstanda jańa bir palataly Quryltai depýtattarynyń alǵashqy sailaýy ótýde. Daýys berý barysyn qazaqstandyq jáne sheteldik baqylaýshylar baqylaýda. Sailaý protsesimen tanysý maqsatynda Astanadaǵy №282 sailaý ýchaskesine Resei Federatsiiasy Ortalyq sailaý komissiiasynyń tóraiymy Ella Pamfilova bardy, dep habarlaidy ult.kz.
Ella Pamfilova daýys berý barysymen tanysyp, komissiia músheleriniń jumysyn jáne sailaýshylar úshin jasalǵan jaǵdailardy baǵalady. Ol Resei Ortalyq sailaý komissiiasynyń ókilderi buǵan deiin de Qazaqstandaǵy sailaýlarǵa turaqty túrde baqylaýshy retinde qatysyp kelgenin atap ótti. Alaida Ortalyq sailaý komissiiasynyń tóraiymy retinde Qazaqstanǵa sailaýdy baqylaý úshin alǵash ret kelgenin aitty.
«Qazaqstandaǵy ár sailaýǵa Reseiden mindetti túrde meniń áriptesterim keledi. Al men Ortalyq sailaý komissiiasynyń tóraiymy retinde alǵash ret kelip otyrmyn. Men áriptesime mindetti túrde kelemin dep ýáde bergen edim. Óitkeni bul sailaýdyń qanshalyqty mańyzdy ekenin túsinemin. Bul – jańa Konstitýtsiiaǵa sáikes ótip jatqan Quryltaidyń alǵashqy sailaýy», – dedi Ella Pamfilova.
Onyń aitýynsha, Qazaqstan men Reseidiń sailaý organdary tyǵyz yntymaqtastyq ornatyp, tájiribelerimen turaqty túrde almasyp keledi. Qazaqstandyq mamandar Reseidegi sailaýlarǵa qatyssa, reseilik áriptester óz kezeginde Qazaqstandaǵy sailaý naýqandaryn baqylaýǵa qatysady.
«Búgin biz birneshe sailaý ýchaskesine de bardyq. Olardyń barlyǵy ýaqytynda ashyldy. Komissiia músheleriniń daiyndyǵy óte jaqsy. Olardy oqytý boiynsha úlken jumys júrgizilgeni kórinip tur. Árqaisysy óz mindetin jaqsy biledi, sailaýshylarǵa óte muqiiat ári sypaiy qarym-qatynas jasaidy. Daýys berý qupiiasy qamtamasyz etilgen. Uiymdastyrý deńgeii óte joǵary», – dedi ol.
Ella Pamfilova Qazaqstandaǵy sailaý protsesinde Resei tájiribesinde qoldanýǵa bolatyn birqatar sheshimderge nazar aýdarǵanyn da aitty.
Onyń sózinshe, biýlleten alǵan kezde sailaýshy tizimnen tek óziniń jeke derekterin ǵana kóre alady. Resei OSK tóraiymy bul tájiribege oń baǵa berip, ony Reseide de qoldaný múmkindigi qarastyrylatynyn jetkizdi.
«Men birneshe óte paidaly sheshimge nazar aýdaryp úlgerdim. Maǵan jeke derekterdiń tolyq qupiialylyǵyn qamtamasyz etýge múmkindik beretin trafaretter óte unady. Sailaýshylar biýlleten alǵan kezde qol qoiǵan ýaqytta tizimnen tek óz derekterin ǵana kóredi. Bul – óte jaqsy sheshim. Meniń oiymsha, biz de osy tájiribeni qoldanamyz. Sonymen qatar nazarymyzǵa alǵan basqa da tustar bar», – dedi Ella Pamfilova.
Sondai-aq Ella Pamfilova Qazaqstanǵa sapary barysynda basqa memleketterdiń sailaý organdarynyń ókilderimen kezdesip, tájiribe almasqanyn habarlady. Onyń aitýynsha, Qazaqstandaǵy sailaýdy baqylaý úshin 22 eldiń ókilderi kelgen. Ol mundai kezdesýler memleketterge bir-biriniń tiimdi tájiribelerin zerdeleýge múmkindik beretinin atap ótti.
Sóz sońynda Ella Pamfilova Qazaqstandaǵy daýys berý kúniniń sátti ótýine tilektestik bildirip, sailaýdyń uiymdastyrylý deńgeiine oń baǵasyn berdi.
