Qazaqstanda júrgizýshilerdi daiarlaityn oqý uiymdaryna baqylaý kúsheitilip, elektrosamokattardyń trotýarlar men jaiaý júrginshiler joldarymen júrýine tyiym salynady, dep habarlaidy ult.kz.
Ishki ister ministrligi Memleket basshysy Qasym-Jomart Toqaev 2026 jylǵy 24 maýsymda qol qoiǵan "Qazaqstan Respýblikasynyń keibir zańnamalyq aktilerine tsifrlandyrý, derbes derekterdi qorǵaý, jol qozǵalysy jáne kóliktegi ozyq tehnologiialardy retteý máseleleri boiynsha ózgerister men tolyqtyrýlar engizý týraly" zańǵa túsinikteme berdi.
Vedomstvonyń málimetinshe, jol qozǵalysy salasyndaǵy ózgerister jol qaýipsizdigin arttyrýǵa, júrgizýshilerdi sapaly daiarlaý júiesin qalyptastyrýǵa jáne osy saladaǵy memlekettik baqylaýdy kúsheitýge baǵyttalǵan.
Osyǵan bailanysty jol qozǵalysy qaýipsizdigin qamtamasyz etý jónindegi ýákiletti organ – Ishki ister ministrligine júrgizýshilerdi daiarlaityn oqý uiymdaryna qyzmet júrgizýge ruqsat berý jáne olardyń jumysyn baqylaý quzyreti beriledi.
Zańdaǵy mańyzdy jańalyqtardyń biri – elektrosamokattardyń trotýarlar men jaiaý júrginshiler joldarymen júrýine tyiym salý. Ministrlik mundai kólik quraldarynyń, ásirese balalar úshin, jaiaý júrginshiler qaýipsizdigine naqty qaýip tóndiretinin atap ótti.
Vedomstvo dereginshe, 2025 jyly elimizde elektrosamokat júrgizýshileriniń kinásinen 139 jol-kólik oqiǵasy tirkelip, saldarynan 149 adam jaraqat alǵan.
Sonymen qatar túzetýlerge sáikes, "Jol júrisi týraly" zańnan eldi mekenderde qozǵaltqyshy jumys istep turǵan kólikti turaqta qaldyrýǵa qatysty tyiym alynyp tastalady. Budan bólek, jol qozǵalysyn avtomatty túrde tirkeitin kameralardy qoldaný aiasy keńeitilip, elektromobilder úshin arnaiy memlekettik tirkeý nómirleri engiziledi.
