Sátbaev qalasynda gorno-metallýrgiia salasy qyzmetkerleriniń qurmetine arnalǵan saltanatty jiyn ótti. «Qazaqmys qazynasy» tujyrymdamasy aiasynda uiymdastyrylǵan bul sharanyń ózegi — kompaniianyń negizgi qundylyǵy eńbek adamdary ekendigin taǵy bir márte aishyqtaý boldy, dep habarlaidy Ult.kz.
Merekelik jiynǵa óndiris ozattary men ardagerlerden bólek, Ulytaý oblysynyń ákimi Eset Baiken, aimaqtyq máslihat ókilderi, «Atameken» UKP jáne «Qazaqmys» korporatsiiasynyń basshylyǵy qatysty.
Óńir basshysy Eset Baiken kenshilerdi kásibi merekelerimen quttyqtap, akademik Qanysh Sátbaev salyp ketken dańqty joldyń búginde laiyqty jalǵasyp jatqanyn jetkizdi. Óz kezeginde «Qazaqmys korporatsiiasy» JShS Baqylaý keńesiniń tóraǵasy Nurmuhambet Ábdibekov óndiriletin mystyń jahandyq «jasyl» ekonomikaǵa kóshýdegi strategiialyq mańyzyn jáne árbir qyzmetkerdiń qosqan úlesin erekshe atap ótti.
Búgingi tańda «Qazaqmys» qurylymyna 14 kenish, 5 baiytý fabrikasy jáne 2 mys balqytý zaýyty kiredi. Bul óndiris oshaqtarynda 34 myńnan astam maman eńbek etýde, sonymen qatar 103 eńbek áýletiniń sabaqtastyǵy saqtalǵan. Kompaniia óndiristi jańǵyrtý men qaýipsizdikke úzdiksiz investitsiia quiyp keledi: 2026 jyly eńbekti qorǵaýǵa 16 milliard teńge bólinse, Jezqazǵanda gazdardy 99%-ǵa deiin ustap qalatyn jańa kúkirt qyshqyly tsehynyń qurylysy júrip jatyr.
Shara barysynda sala úzdikterine «Eńbek ardageri» medaldary, «Kenshi dańqy» jáne «Eńbek dańqy» tósbelgileri tabys etildi. Sonymen birge «Ulytaý qaiyrymdylyq qory» atynan kópbalaly otbasyǵa úsh bólmeli páterdiń kilti syiǵa tartyldy. Kesh sońy merekelik kontserttik baǵdarlamaǵa ulasty.
