«Qazaqmys korporatsiiasy» JShS-niń Qaýipsizdik qyzmeti kompaniiaǵa tiesili jeke qorǵanys quraldarynyń urlanǵanyn anyqtady. Oqiǵa boiynsha kináli tulǵa sot sheshimimen jaýapqa tartyldy, dep habarlaidy ult.kz.
Kompaniianyń málimetinshe, №67 «Batys» ken ornynda qoima meńgerýshisi bolyp jumys istegen merdiger uiymnyń qyzmetkeri jalǵan taýar-kólik júkqujatyn paidalanyp, Ultra-210 markaly respiratorlardy zańsyz iemdengen. Keltirilgen materialdyq shyǵyn kólemi 2 131 426 teńgeni qurady.
Ishki tekserý aiaqtalǵannan keiin barlyq materialdar quqyq qorǵaý organdaryna joldanǵan. Sotqa deiingi tergeý barysynda kúdikti óz kinásin tolyq moiyndap, kompaniiaǵa keltirilgen shyǵyndy tolyq ótegen. Sondai-aq ol kináni moiyndaý týraly protsestik kelisim jasaǵan.
Isti qaraǵan Sátbaev qalalyq soty aiyptalýshyny kináli dep tanyp, oǵan probatsiialyq baqylaýmen úsh jyl merzimge bas bostandyǵyn shekteý jazasyn taǵaiyndady.
Sonymen qatar sot sheshimimen sottalǵan azamat jábirlenýshilerge ótemaqy qoryna zańda kózdelgen mindetti tólemdi tóleýge mindetteldi. Al tárkilengen múlik zańdy iesine qaitaryldy.
