Memleket basshysy Qyrǵyzstan Táýelsizdigine 35 jyl tolýyna orai Prezident Sadyr Japarovqa quttyqtaý jedelhatyn joldady, dep habarlaidy ult.kz.
"Bul aitýly mereke qyrǵyz halqynyń erkindikke, derbestik pen táýelsizdikke umtylysyn aishyqtaidy. Osy jyldar ishinde Qyrǵyzstan el bolyp eńse tikteýden bastap, ornyqty damýǵa deiingi joldy abyroimen eńserdi. Memlekettiliktiń irgesin bekitip, bai rýhani murasyn saqtap qaldy. Halyqaralyq arenada bedeldi elge ainaldy. Buǵan Qyrǵyz Respýblikasynyń 2027-2028 jyldary BUU Qaýipsizdik Keńesiniń turaqty emes múshesi bolyp sailanýy jarqyn mysal bola alady", – dep jazylǵan quttyqtaýda.
Jedelhatta elderimizdi ǵasyrlardan tamyr tartatyn dostyq pen tatý kórshilikke negizdelgen baýyrlastyq qarym-qatynas bailanystyratyny atap ótilgen. Prezident strategiialyq seriktestik pen odaqtastyq qos halyqtyń igiligi jolynda qarqyndy túrde nyǵaia beretinine senim bildirdi.
Qasym-Jomart Toqaev Sadyr Japarovtyń jaýapty memlekettik qyzmetine tabys, al baýyrlas qyrǵyz halqyna qut-bereke tiledi.
