Qarmet kompaniiasynda qyzmetkerlerdi saltanatty marapattaý rásimi ótti. Kópjyldyq adal eńbegi men ónerkásiptiń damýyna qosqan úlesi úshin kásiporyn jumysshylary «Eńbek dańqy» III dárejeli tósbelgisimen, sondai-aq Qaraǵandy oblysy ákiminiń Qurmet gramotalary men Alǵys hattarymen marapattaldy. Saltanatty sharany Qazaqstan Respýblikasy Ónerkásip jáne qurylys ministri Ersaiyn Naǵaspaev ashty.
«Memleket basshysy Qasym-Jomart Kemeluly Toqaev óndiristi jańǵyrtý, básekege qabiletti ónim kólemin arttyrý jáne jańa tehnologiialardy engizý boiynsha naqty mindetter qoidy. Salanyń ári qarai damýy kásibi kadrlarsyz múmkin emes. Sizderdiń janqiiarlyq eńbekterińiz, joǵary jaýapkershilikterińiz ben mamandyqqa degen adaldyqtaryńyz – barlyq jetistiktiń negizi», – dep atap ótti ministr.
«Eńbek dańqy» tósbelgisi – salanyń mańyzdy marapattarynyń biri. Ol kópjyldyq adal eńbek, joǵary óndiristik kórsetkishter jáne Qazaqstannyń ónerkásiptik áleýetin nyǵaitýǵa qosqan eleýli úles úshin beriledi. Ministr sondai-aq qazaqstandyq metallýrgiianyń strategiialyq mańyzyn erekshe atap ótti. Bul salada 200 myńnan astam adam eńbek etedi jáne el ekonomikasynyń 8 paiyzdan astamyn qalyptastyrady.
Joǵary marapattarǵa ken-metallýrgiia salasynyń damýyna jyldar boiy súbeli úles qosyp kele jatqan jumysshy jáne injenerlik-tehnikalyq mamandyq ieleri ie boldy. Olardyń qatarynda domna peshteriniń gornovoilary, aglomeratshylar, óndiristik ýchaskelerdiń brigadirleri, mashinister, injenerler jáne ózge de mamandar bar.
Qaraǵandy oblysy ákiminiń orynbasary Ermek Alpysov metallýrgterdiń kúndelikti eńbegi óńir men eldiń indýstriialyq damýynyń negizi ekenin atap ótti.
«Dál sizderdiń eńbekterińiz óńir men tutas el ekonomikasynyń berik negizin qalaidy. Búginde Qarmet jańa damý kezeńine qadam basty. Kásiporynda aýqymdy jańǵyrtý baǵdarlamasy júzege asyrylýda. Metallýrg eńbegi dańǵaza sózdi qajet etpeidi, onyń nátijesi óndirilgen metall tonnasy, qabyldanǵan sheshimderdiń dáldigi jáne jaýapkershilikpen ólshenedi. Jas mamandarǵa arnaiy úndeý jasaǵym keledi: tájiribeli áriptesterińizden úirenińizder, kásiporynnyń eńbek dástúrlerin qurmetteńizder, kásibi bilimderińiz ben daǵdylaryńyzdy únemi jetildirip otyryńyzdar. Eń bastysy – óndiriste qaýipsizdik árdaiym birinshi orynda bolýy tiis. Barshańyzdy kásibi merekelerińizben shyn júrekten quttyqtaimyn! Sizderge zor densaýlyq, otbasylaryńyzǵa amandyq jáne eńbekterińizge tabys tileimin. Árbir jetistigimiz el damýyna qosylǵan mańyzdy úleske ainala bersin!», – dedi Ermek Alpysov.
Metallýrgterdiń «Jaqtaý» kásipodaǵynyń tóraǵasy Viktor Shetinin de quttyqtaý sóz sóilep, eńbek ujymyn qoldaý jáne qyzmetkerlermen ashyq dialogty damytý birlesken jumystyń basty baǵyttarynyń biri ekenin atap ótti.
«Biz úshin eń mańyzdysy – adamdardy tyńdaý, olardyń usynystaryn eskerý jáne óndiristiń turaqtylyǵy men árbir qyzmetkerdiń ál-aýqatyna áser etetin máselelerdi birlese sheshý. Búgin barshańyzǵa adal eńbekterińiz, kásibilikterińiz jáne kásiporynnyń damýyna qosqan zor úlesterińiz úshin shynaiy alǵysymdy bildiremin. Sizderdiń eńbekterińiz eń joǵary qurmetke laiyq. Sizderge jáne otbasylaryńyzǵa zor densaýlyq, baq-bereke tileimin. Kombinatymyzǵa turaqty ári qaýipsiz jumys, jańa jetistikter men senimdi damý tileimin. Kásipornymyz ben týǵan qalamyzdyń bolashaǵy jarqyn bolsyn! Mereke qutty bolsyn!», – dedi Viktor Shetinin.
Marapat ieleriniń biri – qubyrelektrdánekerleý tsehynyń aýysym sheberi Ardaq Nuralyuly Saǵadiev. Ol eńbek jolyn kásiporynda 18 jasynda bastap, qarapaiym jumysshydan óndiristik aýysym basshysyna deiingi joldan ótti.
«Kásiporynda 18 jasymnan beri jumys isteimin. Alǵashynda shlifovshik boldym, keiin brigadir qyzmetin atqardym. Odan soń tehnolog-operator bolyp aýysyp, aýysymmen jumys istedim. Bul kásiporyn meniń ómirimniń mańyzdy bóligine ainaldy. Búgin alǵash ret osyndai joǵary marapatqa ie bolyp otyrmyn. Áser keremet. Bul – men úshin úlken mártebe jáne eńbegimniń moiyndalýy. Kompaniiaǵa osyndai joǵary baǵa bergeni úshin alǵysym sheksiz», – dedi ol.
Marapattalǵandardyń qatarynda Qarmet metallýrgiialyq kombinatynyń temirjol kóligi basqarmasynyń jol jóndeýshisi Saltanat Súleimenova da bar.
«Osyndai joǵary marapat alý óte qýanyshty. Áriptesterim úshin de qýanyshtymyn. Sózben jetkizý qiyn – emotsiia óte kóp. Eńbegińniń baǵalanǵany – úlken baqyt. Barsha áriptesterimdi Metallýrg kúnimen quttyqtaimyn. Eń bastysy – bárimiz aman-esen bolaiyq!», – dedi ol.
Marapattaý rásimi Metallýrg kúnine arnalǵan merekelik is-sharalardyń mańyzdy bóligine ainalyp, taǵy bir márte basty qaǵidany aiqyndady: Ol - Qarmet jetistikteriniń negizinde adamdar turǵany. Olardyń tájiribesi, kásibiligi jáne óz isine degen adaldyǵy kásiporynnyń senimdi damýyna, eńbek dástúrleriniń saqtalýyna jáne jańa óndiristik belesterdiń baǵyndyrylýyna jol ashady.
