Qaraǵandyda 28 jastaǵy Dinara Minbaevanyń qazasyna bailanysty qylmystyq isti qaita qaraý máselesi kóterildi. Eki balanyń anasy 2025 jyldyń 3 shildesinde kúieýimen birge turǵan páterden óli kúiinde tabylǵan, dep habarlaidy ult.kz.
Qaiǵyly oqiǵadan keiin qylmystyq is qozǵalǵan. Alaida keiin onyń ólimi sýitsid retinde saralanyp, is toqtatylǵan. Marqumnyń týystary tergeýdiń bul qorytyndysyna kúmán keltirip otyr.
Dinaranyń ápkesiniń sózinshe, áiel qaitys bolardan bir kún buryn kúieýimen janjaldasqan. Sol kezde politsiia shaqyryp, jubaiynyń ózine kúsh kórsetkenin aitqan. Alaida týystarynyń málimdeýinshe, politsiia qyzmetkerleri aryzdy tek til tigizý faktisi boiynsha jazýǵa kóndirgen.
Sol túni Dinara anasyna qońyraý shalyp, kúieýiniń ózin uryp, tunshyqtyrǵanyn aitqan. Sondai-aq balalaryn alyp ketýdi ótingen. Anasy Shymkentten jolǵa jinalǵanymen, keiin qyzy telefon qońyraýlaryna jaýap bermegen.
Marqumnyń jaqyndary onyń denesinen kógergen izder baiqalǵanyn aitady. Budan bólek, Dinara qaitys bolǵannan keiin páterdegi kilemniń joǵalyp ketkenin alǵa tartyp otyr.
Týystary áieldiń ólimine qatysty ózge de boljamdar muqiiat tekserilýi kerek dep sanaidy. Olar Bas prokýratýra men Ishki ister ministrligine júginip, isti qaita qaraýdy jáne oqiǵaǵa deiin páterge barǵan politsiia qyzmetkerleriniń áreketine quqyqtyq baǵa berýdi suraǵan.
Dinara Minbaevanyń artynda úsh jáne bir jarym jastaǵy eki uly qaldy.
