Qaraǵandy oblysynda biyl injenerlik infraqurylymdy jańǵyrtý boiynsha 108 joba iske asyrylady. Kommýnaldyq jelilerdiń 438 shaqyrymyn qaita jańǵyrtyp, jańadan salý josparlanǵan, dep habarlaidy ult.kz.
Jumystardyń negizgi bóligi sýmen jabdyqtaý jáne sý burý júielerine tiesili – 237,3 shaqyrym. Taǵy 149,6 shaqyrym elektrmen jabdyqtaý jelilerin, 51,3 shaqyrym jylýmen jabdyqtaý jelilerin quraidy.
Jobalar birden birneshe baǵyt boiynsha júzege asyrylýda. 14 nysan energetika jáne kommýnaldyq sektorlardy jańǵyrtýdyń Ulttyq jobasyna engizilgen. 33 joba biýdjet qarajaty esebinen qarjylandyrylsa, taǵy 61 joba tabiǵi monopoliialar sýbektileriniń investitsiialyq baǵdarlamalary aiasynda iske asyrylýda.
Jumystar tek kommýnaldyq jelilerdi qamtymaidy, energetika nysandaryn da jańǵyrtý kózdelgen. Óńirde qazandyqtar, týrbinalar jáne basqa da jabdyqtar jóndelip jatyr. Qarmet-tiń JEO-2-de jańa qazandyq iske qosylsa, Topar MAES-inde týrbina aýystyryldy.
Sonymen qatar jańa energetikalyq qýattar qurylyp jatyr. Qaraǵandyda JEO-3-tiń energoblogyn, Balqash JEO-da jańa qazandyq salý jumystary jalǵasýda. Eki jobany da 2028 jyly aiaqtaý josparlanǵan.
Kommýnaldyq infraqurylymdy jańǵyrtý jumystary Qaraǵandy, Temirtaý, Shahtinsk, Abai, Saran qalalarynda jáne oblys aýdandarynda júrgizilýde. Munda tek aǵymdaǵy jóndeý jumystary ǵana emes, jelilerdiń eń tozǵan ýchaskelerin qaita jańǵyrtý da kózdelgen.
– Búginde aldaǵy jylytý maýsymyna daiyndyqqa erekshe kóńil bólinip otyr. Negizgi jumystar kestege sáikes júrgizilýde. Bizdiń mindetimiz – qys mezgilinde tirshilikti qamtamasyz etetin barlyq júielerdiń senimdi jumys isteýin qamtamasyz etý, – dedi Qaraǵandy oblysy ákiminiń birinshi orynbasary Azamat Taijanov.
Onyń aitýynsha, infraqurylymdy jańartý jumystary kelesi jyly da jalǵasady. Óńirdiń mindeti – jelilerdi qaita jańǵyrtý kólemin kezeń-kezeńimen ulǵaityp, kommýnaldyq infraqurylymnyń tozý deńgeiin tómendetý.
– Kommýnaldyq infraqurylym senimdi jumys istemeiinshe, óńirdiń damýy, investitsiia tartý jáne jańa jumys oryndaryn qurý týraly aitý múmkin emes. Sondyqtan búgin biz jelilerdi jóndeýmen ǵana shektelmei, Qaraǵandy oblysynyń bolashaqtaǵy damýyna negiz qalap jatyrmyz, – dep atap ótti Azamat Taijanov.
