Jolaýshynyń orynsyz qaljyńy Almaty – Aqtaý baǵytyndaǵy FlyArystan reisinde qosymsha tekserý júrgizilip, ushaqtyń keshigýine sebep boldy. Jolaýshylardyń biriniń aitýynsha, qol júgin ornalastyrý kezinde egde jastaǵy er adam kómektesip, aýyr sómkeni kórgen soń onyń ishinde bomba bolýy múmkin dep ázildegen, dep habarlaidy ult.kz.
3 qyrkúiekte Almaty halyqaralyq áýejaiynda Kóliktegi politsiia basqarmasynyń qyzmetkerleri aviatsiialyq qaýipsizdik mamandarymen birlesip, jolaýshyny tekserdi.
Tekserý barysynda tyiym salynǵan zattar men jarylǵysh zattar anyqtalǵan joq. Áýejaida evakýatsiia júrgizilgen joq, áýe ailaǵy shtattyq rejimde jumysyn jalǵastyrdy.
Jolaýshy usaq buzaqylyq jasaǵany úshin ákimshilik jaýapkershilikke tartyldy. Jinalǵan material sottyń qaraýyna jiberiledi.
Kóliktegi politsiia departamenti azamattardy ushaq bortynda jarylǵysh zattar týraly ázildemeýge shaqyrdy. Óitkeni mundai sózder qaýipsizdik sharalarynyń kúsheiýine jáne zań aldynda jaýapkershilikke tartylatyndyǵyn eskertedi.
Esterińizde bolar, áýejaida «bomba bar» dep ázildegen «Qairat» klýbynyń dárigeri qamaýǵa alynǵan bolatyn.
