Qazaqstannyń týroperatorlar qaýymdastyǵy áýekompaniialardan týristerden koronavirýsqa jasalǵan PTR anyqtamasyn talap etýdi suraidy, dep habarlaidy QazAqparat.
Eldegi týroperatorlar qaýymdastyǵy osyndai sheshim shyǵardy. Qazir jańa qaýlyny kútip otyr. Qatań tártip shetel azamattarmen qatar ózge memleketke saparlap ketken otandastarymyzǵa da ortaq. Iaǵni, elge oralý úshin mindetti túrde koronavirýsqa tekserilý kerek. Qazir aviakompaniialar jańa erejeden habardar etilip jatyr.
«Birinshiden, elde koronavirýs infektsiiasyn juqtyrǵandar sany ósti. Indet kúrt órshidi. Eki qalada lokdaýn jariialandy. Ekinshiden, memleket shetelden ushyp kelgen azamattarǵa PTR test jasaý úshin kóp qarajat jumsap jatyr. Sonymen qatar, jolaýshylar test nátijiesi shyqqansha qonaq úige ornalastyrylady. Bul qosymsha qaýip týdyrady. Olardyń bireýi infektsiia taratýshy bolýy múmkin», - deidi Qazaqstan týroperatorlar qaýymdastyǵynyń prezidenti Inna Rei.
Onyń aitýynsha, kóptegen týrister demalystan PTR test tapsyrmai keledi. Tipti, keibireýinen oń nátije shyǵyp jatyr.
«Bul úlken másele. Týrister PTR testi nege shetelde ótkizgisi kelmeidi? Sebebi oń nátijie kórsetse, shet elde qalyp qoiamyz dep qorqady. Bul kóptegen jańa máseleler týǵyzady. Sondyqtan biz týristerdi indet juqtyrýdan barynsha qorǵalǵan kýrorttarǵa jiberýge tyrysamyz. Sondai-aq, saqtandyrý bar. Saqtandyrý mindetti túrde týr paketine kiredi», - dep qosty spiker.
Sonymen qatar, ol QR Úkimeti týrkompaniialardan adamdar elge oralmas buryn PTR testileýden ótýin qamtamasyz etýdi suraǵanyn basa aitty.
«Biraq, biz barlyq jolaýshylardy qamtamasyz ete almaitynymyz anyq. Qazir jańa qaýlyny kútip otyrmyz. Onda týrister ushaqqa otyrar aldynda PTR anyqtamasyn mindetti túrde kórsetýi kerektigi aitylady. Eger jolaýshylarǵa Qazaqstanǵa kelgennen keiin test tapsyrýǵa ruqsat berilse, onda ol aqyly bolady», - dep qosty Inna Rei.
