QR Bilim jáne ǵylym vitse-ministri Miras Dáýlenov ministrlikke qarasty joǵary oqý oryndarynda professor-oqytýshylar quramynyń jalaqysy qanshaǵa artqanyn aityp berdi, dep habarlaidy QazAqparat.
«Ministrdiń tapsyrmasymen QR Bilim jáne ǵylym ministrligine vedomstvolyq baǵynyshty JOO professorlarynyń, dotsentteriniń jáne oqytýshylarynyń jalaqysyn arttyrý boiynsha úlken jumys júrgizildi. Qazir joǵary oqý oryndarynyń akademiialyq derbestikke ie ekenin jaqsy túsinemiz. Sonymen birge, Bilim ministrligi atalǵan JOO-lardyń jalǵyz aktsioneri retinde olardyń qarjylyq saiasatynyń baǵyttaryn anyqtai alady. Sondyqtan da jalaqyny kóterý týraly másele qoiylyp otyr. 2019 jyly ulttyq joǵary oqý oryndarynda da, memlekettik joǵary oqý oryndarynda da jalaqy ósken. Al 2020 jyly Memleket basshysynyń tapsyrmasymen memlekettik tapsyrys qunynyń ósýine bailanysty professor-oqytýshylar quramynyń jalaqysy ósti», - dedi Miras Dáýlenov ministrlik apparatynyń jinalysynda.
Professorlar boiynsha ulttyq joǵary oqý oryndarynda jalaqy 29%-ǵa, memlekettik joǵary oqý oryndarynda – 19%-ǵa ósti. Dotsentter boiynsha ulttyq JOO-larda jalaqy 31%-ǵa, memlekettik JOO-larda – 11%-ǵa artty. Ǵylymi dárejesi joq oqytýshylar boiynsha – ulttyq JOO-larda 32%-ǵa jáne memlekettik JOO-larda 18%-ǵa ósken.
Onyń aitýynsha, eki jyl ishindegi jalaqy kólemi QR Bilim jáne ǵylym ministrligine qarasty JOO-larda professor-oqytýshylar quramynyń eńbekaqysynyń aitarlyqtai óskenin kórsetedi. Bul jumys ári qarai da jalǵasady.
«Biz oqytýshylardyń halyqaralyq damýyna birtindep kóshýimiz kerek jáne olardyń ǵylymi zertteýler júrgizý qajettigin eskerýimiz kerek. Bul JOO-lardaǵy ǵylymdy damytý úshin óte mańyzdy. Ekinshi mańyzdy másele – búgin tanystyrylyp otyrǵan jalaqy mólsheri. Olardyń naqty ósýi búginde sol professordyń, dotsenttiń nemese oqytýshynyń tolyq stavkasyna bailanysty bolady. Sonymen birge, professor, oqytýshy jáne dotsent stavkasynyń mólsheri JOO-ǵa bailanysty ózgerýi múmkin ekenine nazar aýdarǵym keldi. Osyǵan bailanysty bizdiń JOO-larda biryńǵai tásilder ázirleý qajet. Tájiribeli mamandardy yntalandyrý úshin oqytýshylar jalaqysyn esh dárejesiz kóterý kerek jáne dárejesi bar nemese joq mamandar arasyndaǵy alshaqtyqty azaitý qajet», - dedi vitse-ministr.
