Prezidenttiń saiasi reformalar toptamasy pliýralizm ideiasyn ómirde iske asyrý úshin jaǵdai jasaidy. Mundai pikirdi QR Parlamenti Senatty apparaty basshysynyń orynbasary Maksim Spotkai bildirdi, dep habarlaidy QazAqparat.
«Taiaýda, aldaǵy sársenbi kúni Ulttyq qoǵamdyq senim keńesiniń kezekti otyrysy ótedi. Osynaý sátke ulttyq keńes baiypty nátijemen kelip otyr. Bul - búgin Memleket basshysy qol qoiǵan zańdar jáne taǵy birqatar zań osy aptada Senatta qaralatyn bolady», - dedi ol.
Onyń atap ótýinshe, atalǵan zańdar osyǵan deiin ótken Ulttyq qoǵamdyq senim keńesi otyrystarynda Prezident Qasym-Jomart Toqaev jariia etken saiasi reformalar toptasynyń júzege asyryla bastaǵandyǵyn bildiredi.
«Is júzine kelgende, Ulttyq keńes qyzmetine túrli kózqaraspen qaraýǵa bolady. Degenmen, faktiler ózdiginen-aq sóilep tur. Qoǵamnyń, qazaqstandyqtardyń suranysyna jaýap bere alatyn, qoǵam kótergen saiasi reformalar toptamasy búginde júzege asyrylyp jatyr. Bul otandyq zańnamadaǵy barynsha baiypty ózgerister deýge de bolady. Atap aitar bolsaq, jańa partiia qurý úshin tirkeý shegi 2 ese tómendetilip, jastar men áielderge arnalǵan kvota engizilip otyr. Jalpy, aldaǵy parlamettik sailaýlardan keiin jańa saiasi shynaiylyqty kóretin bolamyz. Prezident qol qoiǵan barlyq zańdar, tolyqtai alǵanda Qasym-Jomart Toqaevtyń saiasi reformalar toptamasy saiasi keńistikte pliýralizm idesin ómirde shynaiy iske asyrýǵa jaǵdai jasaidy», - dedi Maksim Spotkai.
Buǵan deiin Memleket basshysy «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Qazaqstan Respýblikasynyń Zańyna qol qoiǵanyn habarlaǵan edik.
