Qazaqstanda jýyrda Prezidenttik jastar kadr rezervine kandidattardy irikteýdiń ekinshi kezeńi bastalady. Osy oraida atalǵan jobaǵa arnalǵan portal iske qosylady.
Bul týraly Memlekettik qyzmet personalyn basqarý ulttyq ortalyǵy AQ-nyń bas direktory Kenjebek Sanabaev málim etti, dep habarlaidy "Ult aqparat".
«Biz arnaiy internet portal ázirledik, ol erteńnen bastap qoljetimdi bolady. Dálirek aitqanda pkreserv.gov.kz saity birneshe bólimnen turady, basty bet, joba týraly, jii qoiylatyn suraqtar, galereia jáne irikteýdiń qorytyndysy. Portalda Prezidenttik jastar kadr rezervi jobasyna qatysty barlyq aqparattar qazaq jáne orys tilderinde bolady. Iaǵni jobany ótkizýdiń barlyq kezeńi saitta ashyq túrde jariialanady. Kez kelgen adam kandidattyń aty-jónin terip irikteýdiń nátijesimen tanysa alady. Bul ashyqtyq pen jariialylyqty qamtý maqsatynda jasalyp otyr», - dedi Kenjebek Sanabaev OKQ-de onlain ótken baspasóz máslihatynda.
Onyń aitýynsha, kadr rezervine testileý kezinde kandidattarǵa táýlik boiy qoldaý kórsetiledi.
«Sonymen qatar irikteýge qatysýshy kandidattarda túrli suraqtar týyndaýy múmkin. Osy oraida kandidat óz suraǵy men ótinishin elektrondy poshta kómegimen portalǵa jibere alady. Odan ári mamandar qoiylǵan suraqtarǵa tiisti jaýap beredi. Kandidat portalǵa tirkeler aldynda odan ETsQ-y (elektrondy tsifrlyq qoltańba) men onyń kelisimi suralady jáne ár kandidattyń jeke kabineti bolady. Sondai-aq, irikteýge qatysýshy úmitker portalǵa tirkelgen soń zań aiasynda portaldaǵy ár áreketine jaýapty bolady», - deidi ol.
Buǵan deiin habarlaǵanymyzdai, elimizde Prezidenttik jastar kadr rezevrine kandidattardy irikteýdiń ekinshi kezeńi bastalady.
