Memleket basshysy Qasym-Jomart Toqaev parlament palatalarynyń búgingi birlesken otyrysynda jyl saiynǵy Qazaqstan halqyna Joldaýyn jetkizdi.
Biylǵy joldaýda eldiń aldaǵy jyldardaǵy áleýmettik-ekonomikalyq damýynyń basym baǵyttary jaily aityldy.
Bul týraly Filosofiia, saiasattaný jáne dintaný institýtynyń jetekshi ǵylymi qyzmetkeri Dinara Jańabaeva aitty, dep habarlaidy QazAqparat.
Prezidenttiń kezekti Joldaýy qoǵamǵa baǵyttalǵan kóptegen baǵdarlamalyq qujattardyń ishindegi eń mańyzdylarynyń biri jáne ol pandemiia kezindegi eldiń áleýmettik-ekonomikalyq, mádeni jáne rýhani damýynyń jańa múmkindikterin izdený úshin basty baǵdar bolmaq. Óz baiandamasynda Memleket basshysy eldiń áleýmettik – ekonomikalyq damýyna tolyq taldaý jasap, halyq pen qoǵamnyń igiligin arttyrý jolyna qajet jańa mindetterdi qoidy. Sonyń ishinde, ásirese, densaýlyq saqtaý, bilim jáne ǵylym, til máselelerine erekshe toqtalyp ótti.
«Ǵylym jolyndaǵy azamattar úshin ǵylymi zertteýlerdi yntalandyrý maqsatynda granttyq ǵylymi jobalardy júzege asyrý 3 jyldan 5 jylǵa uzartylýy kóńil qýantarlyq jańalyq boldy»,-deidi ǵalym.
Sonymen qatar, Qasym-Jomart Toqaev jetekshi ǵalymdardyń jalaqy máselesin sheshý maqsatynda «Ǵylymdy damytý – bizdiń asa mańyzdy basymdyǵymyz. Bul saladaǵy túitkilderdiń sheshimin tabý úshin jyldyń sońyna deiin zańnamaǵa ózgerister engizý qajet. Eń aldymen, jetekshi ǵalymdarymyzǵa turaqty jáne óz eńbegine laiyqty jalaqy tóleý máselesin sheshý kerek», – dep atap ótti.
Shyǵystyń ǵulamasy Ál-Farabi kezinde «Ǵylymy joq eldiń bolashaǵy bulyńǵyr» degen edi, sondyqtan da eldegi ǵylymdy damytý men ǵalymdardy qoldaý jolynda naqty, júieli saiasattyń bolýy shart.
«Qazirgi zamanýi álemde elimizdiń árbir azamaty joǵary ári sapaly bilim men qajyrly eńbektiń nátijesinde ǵana biik belesterden kórine alady. Biylǵy Joldaý bolashaǵymyzdyń irgesin nyq bekitýge mindettep, Ortalyq Aziiadaǵy kóshbasshy memleketterdiń birine ainalyp, eldiń ál-aýqatyn jaqsartý jolynda jemisti jumys isteýge, senimdi áreket etýge yqpalyn tigizedi. Joldaýdaǵy alǵa qoiylǵan mindetter el jetistikterin arttyrýǵa, damýdyń sapaly jańa deńgeiine shyǵarýǵa birden-bir múmkindik bolmaq», - deidi Dinara Jańabaeva.
