Foto: Aqorda
Memleket basshysy Qasym-Jomart Toqaev jańa Konstitýtsiia jobasynyń mańyzy týraly aityp, onyń táýelsizdik, egemendik jáne ulttyq qundylyqtardy qorǵaýǵa baǵyttalǵanyn málimdedi, dep habarlaidy Ult.kz.
Prezidenttiń aitýynsha, jańa Ata zańda Qazaqstannyń táýelsizdigi, egemendigi jáne aýmaqtyq tutastyǵy basty qaǵidattar retinde bekitilgen. Bul normalardy qaita qaraýǵa nemese ózgeshe túsindirýge bolmaidy.
Sonymen qatar Konstitýtsiia jobasynda ulttyq valiýtanyń mártebesi alǵash ret naqty aiqyndalǵan. Memleket basshysy bul normanyń mańyzy zor ekenin atap ótti.
«Tól valiýtanyń Eltańba, Tý jáne Ánuranmen qatar turýy beker emes. Bul jańashyldyq egemendikti, sonyń ishinde qarjylyq derbestikti quqyqtyq turǵydan qorǵaýdy kózdeidi», – dedi Prezident.
Jańa Konstitýtsiia mátinin ázirleýge Prezidenttiń ózi qatysqan
Qasym-Jomart Toqaev jańa Konstitýtsiia jobasynyń mátinin ázirleý protsesine ózi de tikelei qatysqanyn aitty. Onyń sózinshe, qujattaǵy árbir taraý men bap muqiiat qarastyrylǵan.
«Men Memleket basshysy retinde jańa Konstitýtsiia jobasynyń mátinin jazýǵa tikelei atsalystym. Ár taraýyna, ár babyna erekshe mán berip, usynystarymdy Konstitýtsiialyq komissiiaǵa joldadym», – dedi ol.
Prezident sondai-aq qujattaǵy terminderdiń qazaq halqynyń dúnietanymyna sai bolýyna erekshe kóńil bólingenin jetkizdi. Máselen, ol «aýmaqtyq tutastyq» uǵymynyń ornyna «jerdiń tutastyǵy» degen uǵymdy qoldaný máselesin kótergenin aitty. Alaida halyqaralyq tájiribege sáikes «aýmaqtyq tutastyq» termini ózgerissiz qalǵan.
Memleket basshysy jer uǵymynyń qazaq halqy úshin erekshe mańyzǵa ie ekenin atap ótti.
«Jer – qazaq úshin eń qasterli uǵymdardyń biri. Ata-babalarymyz bir qarys jer úshin janyn qurban etken. Onyń tabiǵatyn aialaý, tutastyǵyn saqtaý – qasietti boryshymyz», – dedi Prezident.
Jańa Ata zań – «Halyq Konstitýtsiiasy»
Prezidenttiń aitýynsha, jańa Konstitýtsiia jobasy keń kólemde talqylanyp, azamattardan myńdaǵan usynys túsken. Barlyq oryndy usynystar muqiiat qaralyp, eskerilgen.
Sondyqtan Memleket basshysy bul qujatty «naǵyz Halyq Konstitýtsiiasy» dep ataýǵa bolatynyn aitty.
«Konstitýtsiia jobasy jan-jaqty zerdelenip, qyzý talqydan ótti. Sondyqtan ony naǵyz Halyq Konstitýtsiiasy dep nyq senimmen aita alamyz», – dedi Qasym-Jomart Toqaev.
Konstitýtsiia ózgeristeri tek referendým arqyly qabyldanady
Prezidenttiń aitýynsha, usynylǵan Konstitýtsiia jobasy qabyldansa, memleket pen azamattardyń qarym-qatynasy jańa deńgeige kóteriledi jáne eldiń quqyqtyq júiesi jańarady.
Sonymen qatar Ata zańǵa ózgerister engizý tártibi de ózgeredi. Buǵan deiin Konstitýtsiiaǵa ózgeristerdi Parlament engize alatyn bolsa, endi mundai sheshimder tek jalpyhalyqtyq referendým arqyly qabyldanatyn bolady.
Memleket basshysy bul qadam jekelegen saiasi toptardyń múddesi úshin negizsiz konstitýtsiialyq ózgerister jasaýǵa jol bermeitinin aitty.
Prezident jastardy referendýmǵa qatysýǵa shaqyrdy
Memleket basshysy jastarǵa arnaiy úndeý jasap, referendýmǵa belsendi qatysý el taǵdyryna bei-jai qaramaýdyń belgisi ekenin aitty.
Prezidenttiń sózinshe, jańa Konstitýtsiia jobasy eń aldymen jas urpaqtyń bolashaǵyna arnalǵan.
«Sizder Ata zańǵa úles qosqan azamattar retinde el tarihyna óz esimderińizdi jazyp qaldyra alasyzdar», – dedi ol.
Qasym-Jomart Toqaevtyń aitýynsha, bolashaqta Qazaqstan bilim men ǵylymy damyǵan, zań ústemdigi ornyqqan, tsifrlandyrý men jasandy intellekt keń qoldanylatyn qoǵamǵa ainalýy tiis.
Memleket basshysy elimizdiń bolashaǵy jastardyń belsendiligi men jaýapkershiligine bailanysty ekenin atap ótti.
«Men halqymyzdyń jasampaz qýatyna, jastardyń taýdai talabyna senemin. Birlikpen jumys istesek, Qazaqstannyń bolashaǵy jarqyn bolady», – dedi Prezident.
