Foto: Aqorda
Memleket basshysy Qasym-Jomart Toqaev Shyǵys Qazaqstan oblysynyń ákimi Nurymbet Saqtaǵanovty qabyldap, óńirdiń áleýmettik-ekonomikalyq damýynyń qorytyndylary men aldaǵy josparlaryn talqylady, dep habarlaidy Ult.kz.
Kezdesý barysynda óńir basshysy 2025 jyldyń qorytyndysy boiynsha oblysta oń dinamika baiqalǵanyn málimdedi. Onyń aitýynsha, investitsiia, qurylys, aýyl sharýashylyǵy jáne saýda salalarynda ósim bar. Negizgi kapitalǵa salynǵan investitsiia kólemi 838 mlrd teńgeden asyp, investitsiialyq portfel 101 jobany qamtyǵan.
Qurylys jumystarynyń kólemi 460 mlrd teńgege jýyqtap, aýyl sharýashylyǵy óniminiń jalpy kólemi 550 mlrd teńgeden asqan. Al saýda salasynyń kórsetkishi 2 460 mlrd teńgeden joǵary bolǵan.
Sonymen qatar, 407 myń sharshy metrden astam turǵyn úi paidalanýǵa berilip, jumyssyzdyq deńgeii 4,6 paiyz shamasynda turaqtaǵan. Jalpy 29 myń adam jumyspen qamtylǵan.
Jumyspen qamtýdyń óńirlik kartasy aiasynda biyl 17 440 jańa jumys ornyn ashý josparlanǵan. Onyń ishinde birinshi toqsanda 3 317 jumys orny qurylǵan. Áleýmettik salada ataýly áleýmettik kómek alýshylar sany da azaiyp keledi.
Óńirde aýyldyq aýmaqtardy damytý men qonystanýshylardy qoldaý baǵdarlamalary júzege asyrylyp jatyr. Sonyń ishinde «Shyǵys shaqyrady» jobasy da bar. Infraqurylymdy jańǵyrtýǵa erekshe kóńil bólinip, ótken jyly jalpy uzyndyǵy 856 shaqyrym jol men kóshelerge jóndeý jumystary júrgizilgen.
Kezdesý qorytyndysynda Prezident ekologiialyq jaǵdaidy jaqsartý, ekonomikany ártaraptandyrý, investitsiia tartý jáne týrizmdi damytý baǵytynda jumysty jalǵastyrýdy tapsyrdy.
