Qazaqstan Prezidenti kórnekti memleket jáne qoǵam qairatkeri Temirhan Dosmuhambetovtiń otbasyna kóńil aitý jedelhatyn joldady. Bul týraly óziniń Facebook paraqshasynda QR Prezidentiniń baspasóz hatshysy Berik Ýáli jazdy, dep habarlaidy "Ult aqparat".
Qasym-Jomart Toqaev jedelhatta Temirhan Myńaidaruly elimiz úshin eseli eńbek etip, Qazaqstannyń saiasi-ekonomikalyq, áleýmettik-mádeni damýyna bar kúsh-qairatyn arnaǵanyn atap ótti.
– Týrizm jáne sport ministri, Prezidenttiń Is Basqarmasynyń basqarýshysy, Elorda ákimi laýazymdaryn abyroimen atqaryp, iskerlik qabiletin tanyta bildi. Árdaiym ózine júktelgen mańyzdy mindetterdi úlken jaýapkershilikpen oryndady. Sondai-aq Ulttyq Olimpiada komitetiniń jetekshisi retinde otandyq sport salasynyń órkendeýine sińirgen eńbegi óte mol. Sońǵy jyldary kásipkerlikti jańa deńgeige kóterýge atsalysyp, aýyl sharýashylyǵyn ǵylymi turǵyda damytýǵa zor úles qosty. Áriptesteri men zamandastarynyń ortasynda syily boldy. Temirhan Myńaidarulynyń jarqyn beinesi halqymyzdyń jadynda máńgi saqtalady. Marqumnyń jany jánnatta, imany salamat bolsyn!, – dep jazylǵan Memleket basshysynyń jedelhatynda.
