Foto: Aqorda
Aqordanyń baspasóz qyzmeti Memleket basshysy Qasym-Jomart Toqaevtyń Halyqaralyq áielder kúnimen quttyqtaýyn jariialady.
Qymbatty hanymdar!
Sizderdi Halyqaralyq áielder kúnimen shyn júrekten quttyqtaimyn!
Osy tamasha meiram – barsha názik jandylar qaýymyna arnalǵan erekshe sezim men zor qurmettiń jarqyn kórinisi. Áiel – kóńilge shattyq syilap, shabytqa qanat bitiretin kórkemdik pen sulýlyqtyń simvoly, jasampazdyq pen jańashyldyqtyń qainar kózi. Dúniedegi jaqsylyq ataýlynyń bári áiel zatynan bastaý alady.
Áieldiń jany názik bolsa da, bolmysy – myqty. Olar kez kelgen qiyndyqty eńserip, árdaiym danalyq pen daralyqtyń, shydamdylyq pen batyldyqtyń, senimdilik pen jaýapkershiliktiń ozyq úlgisin kórsetip keledi. Árbir áieldiń ómirge nár beretin, álemge jaryq syilaityn, joqtan bar jasaityn, tipti, jaýlasqandy tatýlastyryp, beibitshilikke shaqyratyn ǵajap qasieti bar. Áiel tabiǵatynyń basty qupiiasy men syry da – osynda.
«Áiel – ulttyń jany» desek, artyq bolmaidy. Ózderińiz bergen tálim-tárbie arqyly urpaqtyń dúnietanymy qalyptasady, jastar ádeptilik, otanshyldyq, eńbekqorlyq, bilimpazdyq syndy asyl qasietterdi boiyna sińiredi.
Uly dalanyń qaisar qyzdary jaily ańyzǵa bergisiz aqiqat áńgimeler ǵasyrdan ǵasyrǵa jalǵasyp keledi. Qazaq arýlarynyń parasattylyǵy men batyrlyǵy jurtymyzdyń jadynda jattalyp, tarihynda tańbalanyp qalǵan. Osy sabaqtastyq qazir de saqtalyp otyr. Kóptegen qyz-kelinshekter Otanymyzǵa qaltqysyz qyzmet etip, mektepter men ýniversitetterde, emhanalar men zerthanalarda, memlekettik mekemeler men qoǵamdyq uiymdarda, óner men bizneste, óndiris oryndary men sharýashylyqtarda, áskeri bólimshelerde jáne el ómiriniń basqa da salalarynda abyroily eńbek etip júr.
Qazaqstan halqymyzdyń keleshektegi taǵdyryna tikelei yqpal etetin aýqymdy jańǵyrý jolyna tústi. Jańa Halyq Konstitýtsiiasy jobasynyń ózegi – elimizdiń Táýelsizdigi, egemendigi, aýmaqtyq tutastyǵy, azamattardyń múddeleri men quqyqtary.
Referendýmǵa shyǵarylǵan jańa Ata zańnyń jobasynda ana men balany qorǵaý, neke jáne otbasy institýtyn kúsheitý máselelerine airyqsha nazar aýdaryldy. Sondai-aq halyqtyń ál-aýqatyn arttyrýǵa, qoǵamda zańdy qurmetteý, tabiǵatty aialaý, ádildik, eńbekqorlyq, jaýapty jáne jasampaz otanshyldyq qaǵidattaryn ornyqtyrýǵa basa mán berildi.
Áielder qaýymy bolashaqta da ózderiniń adaldyǵymen, qarym-qabiletimen, erekshe kúsh-jigerimen Ádiletti, Órkendegen Qazaqstandy qurýǵa belsene atsalysa beretinine kámil senemin.
Barshańyzǵa myqty densaýlyq, baq-bereke, tolaǵai tabys tileimin!
Aita keteiik, osyǵan deiin Memleket basshysy Qasym-Jomart Toqaev Halyqaralyq áielder kúnine arnalǵan saltanatty is-sharada sóz sóilegen bolatyn.
