Úkimettiń basty mindetiniń biri – ana men balanyń densaýlyǵyn saqtaý. Bul týraly Memleket basshysy Úkimettiń keńeitilgen otyrysynda aitty, dep habarlaidy "Ult aqparat".
"Ókinishke orai, sábilerdiń ólimi kóbeidi. Ana ólimi de ósýde. Men perinataldyq qyzmettiń jai-kúiin tekserýge tapsyrma berdim. Onyń qorytyndysy boiynsha tiisti sharalar qabyldanýy kerek edi. Biraq barlyq jumys aýdit deńgeiinde toqtap qaldy. Qazirgi perzenthanalardyń kóbi halyqaralyq standarttarǵa sai emes. Sondyqtan shuǵyl sharalar qabyldap, osy máseleni sheshý qajet" - dedi Qasym-Jomart Toqaev.
Prezident jalpy densaýlyq saqtaý salasynda túitkildi máseleler kóp ekenin tilge tiek etti.
"Qazaqstanda sozylmaly aýrý saldarynan qaitys bolý kórsetkishi óte joǵary. Ásirese, Ekonomikalyq yntymaqtastyq jáne damý uiymyna múshe eldermen salystyrǵanda bizdegi ahýal óte nashar. Meditsina salasyna bólingen qarjy kólemi artqanymen, munda qordalanǵan máseleler sheshimin tappai otyr. Mindetti áleýmettik meditsinalyq saqtandyrý júiesi tiimdi bolmady, naqty nátije joq. Úsh millionǵa jýyq adam meditsinalyq saqtandyrýdan tys qalǵan. Sonyń kesirinen olar densaýlyq saqtaý salasyndaǵy qyzmetterdi tolyq paidalana almaidy. Úkimet Strategiialyq josparlaý jáne reformalar agenttigimen birlesip, meditsinalyq saqtandyrý júiesin jetildirý jóninde usynystar daiyndaýy kerek" - dedi Memleket basshysy.
