«Jolaýshylar tasymaly» AQ bas direktorynyń operatsiialyq máseleler jónindegi orynbasary Iorg Besver temirjol qozǵalysy kezindegi shekteýler týraly aitty, - dep habarlaidy QazAqparat.
«Negizgi sharalar vagondarda ilinip turatyn erejelerde jazylady. Biz jolaýshylarǵa jeke qorǵanys zattaryn – maska, antiseptik, qolǵap pen basqa da dúnielerdi kóp mólsherde alyp júrýge keńes beremiz. Sebebi, maskasyz vokzalǵa kirýge ruqsat joq. Vagondarǵa da kirmeidi. Sondyqtan, jolaýshylarǵa aitarymyz – adamdardyń ómirine jaýap beretin bolǵandyqtan bizge qaýipsizdik mańyzdy. Jolaýshylardyń bizge kómektesýin suraimyz», - dedi Iorg Besver Nurly jol vokzalynda jýrnalisterge.
Sondai-aq, ol jolaýshylardyń qalai otyrǵyzylatynyn jáne qansha bilet satylǵanyn da aitty.
«Jolaýshylardy otyrǵyzý boiynsha shekteý joq, sondyqtan burynǵysha otyrǵyzylady. Poiyz ishinde júrýge shekteý qoiylady, iaǵni vagonǵa mingen jolaýshy tek sonda bolady. Kezek bolmas úshin barlyq jolaýshylarǵa biletterdi onlain alýǵa keńes beremiz», - dep atap ótti spiker.
Onyń aitýynsha, vagondar bir kúnde birneshe ret jeldetilip, dezinfektsiialanady.
«Jeldetý jáne salqyndatý júiesi dezinfektsiialandy, tolyq daiyn. Kúnine kem degende 3 ret vagondar jeldetilip, eki ret tazartylady. Biz óz tarapymyzdan jolaýshylardy qorǵaý úshin qoldan kelgenin jasap jatyrmyz», - dep túiindedi I. Besver.
