1 maýsymnan bastap, jolaýshylar poiyzdarynyń qozǵalysy qaita jandanady. Bul jaǵdaida barlyq sanitarlyq normalar men talaptar saqtalýy tiis. QazAqparat agenttigi vokzaldar men poiyzdardyń qaýipsizdik sharalaryna sholý usynady.
Ár vagonda antiseptik pen maskalar bolady
«Jolaýshylar tasymaly» AQ jyljymaly quramyn ázirledi. Vagon ishindegi temperatýralyq rejim durys bolýy úshin barlyq jeldetkish pen aýa baptaý júieleri tekserilgen. Sondai-aq, vagondar kúndelikti dezinfektsiiadan ótedi. Jolserikterge jolaýshylardyń qaýipsiz júrip-turýyn qamtamasyz etý úshin erejeler men nusqaýlyqtar jasaldy», - «Jolaýshylar tasymaly» AQ «Soltústik» tasymaly boiynsha óńirlik filial direktory Gúlnar Qonysbaeva.
1 maýsymnan bastap, jumysqa kelgen qyzmetkerler kún saiyn meditsinalyq tekserýden ótedi. Sodan keiin sanitarlyq normalardy saqtaý jóninde jeke jáne ujymdyq nusqaýlyq ótedi. Bul barlyq sanitarlyq normalarǵa sáikes kelýge jáne vagondardy daiyndaýǵa arnalǵan. Búginde barlyq qyzmetkerler jeke qorǵanys quraldarymen qamtamasyz etilgen. Ár vagonǵa antiseptik qurylǵylary qoiylyp, jolserikte maskalar, qolǵaptar, antiseptikalyq zattar bolady.
Jolaýshylarǵa jadynama
«Karantin sharalary jeńildegenshe jolaýshylarǵa da birqatar talap qoiylady. Saparǵa shyǵarda jolaýshy dene qyzýyn tekserip alýy kerek. Vokzal aýmaǵyna tek maskamen kirgiziledi. Ár jolaýshy jeke qorǵanys quraldarymen, antiseptikpen júrýi tiis. Jolaýshynyń maskany qanshalyqty jii aýystyratyny tekserilmeidi, barlyǵy – jolaýshynyń óz jaýapkershiliginde bolady. Jolaýshylarǵa túsindirý jumystary júrgiziledi, eshkim vagonnan túsirilmeidi», - deidi G. Qonysbaeva.
Vagonnan-vagonǵa ótý shekteýli bolady. Poiyzdaǵy meiramhana da ýaqytsha jumys istemeidi. Vagon ishindegi ydys-aiaq burynǵydai beriledi. Jolserikter barlyq jýǵysh jáne zararsyzdandyrǵysh zattarmen qamtamasyz etilgen.
«Eń bastysy, biz vagondaǵy jolaýshylarǵa jaǵdai jasaýymyz kerek. Ýaqytynda dezinfektsiialap, bir aýysymda vagondy eki ret, ishki bólme men dárethanany keminde tórt ret jýý kerek. Poiyz kestesine sáikes, aialdama qarastyrylǵan jerlerde jolaýshylar poiyzdan túsip, azyq-túlik satyp ala alady. Bári qalypty rejimde bolady», - dedi kompaniia ókili.
Vagon ishindegi oryndardyń barlyǵyna bilet satylady. Jol júrý biletteri vagondaǵy oryn sanyna sáikes bolady. Birinshi kezeńde platskart jáne kýpe vagondary iske qosylady.
Poiyzda syrqat adam tabylsa, ne isteý kerek?
Poiyz ishindegi jolaýshydan aýrý belgileri baiqalsa, jolserik arnaiy algoritmmen áreket etedi. Jolserik shaǵymdanǵan jolaýshynyń dene qyzýyn ólsheýi kerek. Eger temperatýra 37 gradýstan joǵary bolsa, jolserik jolaýshyny oqshaýlaidy.
«Jolaýshy óz kýpesinde oqshaýlanady, kórshiles jolaýshylar basqa bos nemese qyzmettik kýpege aýystyrylady. Sonymen birge, naýqas jolaýshy kiretin dárethanaǵa ózgeler kirgizilmeidi. Jolserik tutas vagon jolaýshylarynyń maskalaryn aýystyrady. Ol úshin vagondarda rezerv bar.
Sodan keiin jolaýshy oqiǵany poiyz basshysyna baiandaidy. Poiyz basshysy mashinist arqyly eń jaqyn stantsiiaǵa habar berip, syrqattanǵan jolaýshyny túsirip ketedi. Bul algoritm barlyq qyzmetkerge túsindirildi», - dedi G. Qonysbaeva.
Vokzal ǵimarattary qalai jumys isteidi?
Sonymen birge, «Nur-Sultan-1» vokzalynyń basshysy Ǵalym Ábdihanov tilshilerge vokzal ishindegi tártipti túsindirdi.
«Bas sanitarlyq dárigerdiń 14 mamyrdaǵy Qaýlysyna sáikes, vokzaldaǵy barlyq núkteler, ótpe joldar qaita pysyqtaldy, jeldetkishter aýystyryldy. 1 maýsymnan bastap jolaýshylardy qabyldaýǵa daiynbyz. Vokzalda arnaiy meditsinalyq qyzmetkerler táýlik boiy jumys isteidi. Kassalar da táýlik boiy ashyq. Ázirge, «Jolaýshylar tasymaly» AQ 6 kassasy jáne jeke kompaniialardyń 6 kassasy jumys istep tur. Maskasy joq jolaýshy vokzal aýmaǵyna kirgizilmeidi. Ol úshin dárihana jumys isteitin bolady. Al kafe-dámhanalar karantin sharalary jeńildegen soń ashylady», - dedi ol.
Júk tasýshylar qai sanatqa tegin qyzmet kórsetedi?
«Vokzalǵa tek bileti bar jolaýshylar ǵana jiberiledi. Shyǵaryp salýshylar kirgizilmeidi. Jolaýshylardyń aýyr júgin vagonǵa deiin tasymaldaýǵa arnaiy kompaniia kómektesedi. Olar júktiń salmaǵyna qarai túrli tarifpen qyzmet kórsetedi. Alaida, bul jerde zeinetkerlerdiń, qarttardyń, múgedektigi bar adamdar men aiaǵy aýyr áielderdiń júgi tegin tasymaldanady. Karantin kezeńinde olarǵa tegin qyzmet kórsetiledi», - dedi Ǵ. Ábdihanov.
Karantin buryshtary
1 maýsymnan bastap, Qazaqstannyń barlyq vokzaldarynda «Karantin buryshtary» ashylady. Bul COVID-19 juqtyrý kúdigine ilingen jolaýshylardy ýaqytsha oqshaýlaýǵa arnalǵan jáne arnaiy qyzyl lentamen qorshalǵan.
«Vokzal kireberisinde JRVI belgileri baiqalǵan, dene qyzýy 37 gradýstan asqan jolaýshylar «Karantin buryshyna» jiberiledi. Onda maska, qolǵap, antiseptik quraldary qoiylǵan. Meditsinalyq qyzmetkerler jedel járdem shaqyryp, jolaýshyny sonda jiberedi», - dedi Ǵalym Ábdihanov.
Eske sala ketsek, 15 mamyrdan bastap, jolaýshylar biletteri satylyp jatyr. Jolaýshylar poiyzdary 1 maýsymnan júre bastaidy.
Bastapqy kezde 54 poiyz qatynai bastaidy:
- Nur-Sultannan – Almaty, Mańǵystaý, Óskemen, Saryaǵash, Semei, Arqalyk, Pavlodar, Petropavl/Qyzyl tý, Oral, Jezqazgan, Qyzylorda;
- Almatydan – Shymkent, Pavlodar, Aqtóbe, Mańǵystaý, Saryaǵash, Óskemen, Jezqazgan, Oral, Petropavl, Qostanai;
- Kyzylordadan – Semei, Kókshetaý, Petropavl;
- Qostanaidan – Qaraǵandy; Arqalyk;
- Qaraǵandydan – Jezqazǵan;
- Qyzylordadan – Kókshetaý, Petropavl,
- Mańǵystaýdan – Aqtóbe baǵyttary boiynsha jáne qalamańy qatynastary.
Ekinshi kezeń – 10 maýsymnan bastap 39 poiyzdy jolǵa shyǵarý josparlanyp otyr. Onyń ishinde:
- Nur-Sultannan - Almaty, Atyraý, Dostyq, Oral, Aisary, Shymkent;
- Almatydan - Atyraý, Aqtóbe, Oral, Óskemen, Túrkistan, Petropavl;
- Atyraýdan - Mańǵystaý, Aqtóbe, Qulsary, Karabatan baǵyttary boiynsha jáne qalamańy baǵyttary.
Úshinshi kezeńde aimaqtarda sanitarlyq-epidemiologiialyq jaǵdaidyń jaqsarýyna qarai, sonymen birge kórshi eldermen keliskennen keiin 15 poiyzdy júrgizý kózdelgen. Onyń ishinde:
- Almatydan - Tashkent, Saratov, Úrimshi, Novosibir, Qazan;
- Nur-Sultannan – Cheliabi;
- Qaraǵandydan - Máskeý, Omby, Tomsk;
- Atyraýdan - Astrahan baǵyttary boiynsha.
