Qazaqstanda qyzmettik politsiia itteri erekshe balalardy emdeý úshin qoldanyla bastady. Bul týraly QR Ishki ister ministrliginiń resmi ókili Nurdildá Oraz aityp berdi, dep habarlaidy QazAqparat.
«Erekshe balalar úshin itter eń jaqsy dos bolatynyn kópshilik bile bermeidi. Olarǵa basqa balalarmen sóilesý qiyn. Osyndaida balalardy tez baýrap alatyn itter kómekke keledi. Bala men it bir-birin jaqsy túsinedi. Sondyqtan QR IIM Almaty qalasyndaǵy Kinologiialyq ortalyǵy arnaiy túzetý mektep-internatynyń balalaryn qonaqqa shaqyrdy», - dedi Nurdildá Oraz Ishki ister ministrligi uiymdastyratyn aptalyq brifingide.
Resmi ókildiń aitýynsha, balalar qyzmettik ittermen tanysyp, olardyń kórsetilimderine qatysty, tórt aiaqty politsiia kómekshilerin basqarýdy jáne komandalar berýdi úirendi. Mundai kezdesýler úshin politsiia itteri arnaiy balalarmen qarym-qatynas ádisterin úirengen.
«Olar qimyldardy, sóileý intonatsiiasyn óte jaqsy sezinedi jáne durys túsinedi. Arnaiy daiyndalǵan itter psihikalyq jáne júike kerneýin jeńildetedi, belgili bir áleýmettik jáne kommýnikativti minez-qulyqty damytýǵa kómektesedi. Árbir erekshe bala eresek itpen tanysýǵa, kúshiktermen sóilesýge, olardy tamaqtandyrýǵa jáne oinaýǵa múmkindik aldy», - dedi Nurdildá Oraz.
