Politsiia Shamalǵan stantsiiasyndaǵy temir jol ótkelinde bolǵan jantúrshigerlik apattyń kýágerlerin izdep jatyr.
"15 qyrkúiekte Almaty oblysy Shamalǵan stantsiiasyndaǵy ótkelde Almaty 1 – Qostanai baǵytyndaǵy poiyzdyń jolaýshylar avtobýsymen soqtyǵysýyna bailanysty kýágerler men avtobýs jolaýshylarynan kóliktegi politsiia departamenti qyzmetkerlerine habarlasýdy suraimyz: 8-727-296-35-93, 8-701-555-78-02 jáne 8-775-643-00-04", - delingen IIM baspasóz qyzmeti taratqan habarlamada.
Buǵan deiin ishki ister ministri Erlan Turǵymbaev málimdegendei, tergeý toby avtobýs pen poiyzdyń soqtyǵysýyna joldy baqylaýshynyń da kináli bolýy múmkin ekenin joqqa shyǵarmaidy.
"Qazir oqiǵa ornynda bolyp, soqtyǵysýdyń aldyn alý úshin shara qoldanýy tiis bolǵan baqylaýshynyń kinási bar-joǵy anyqtalyp jatyr. 344, 345-shi baptar boiynsha qylmystyq ister qozǵaldy: bul - jol qozǵalysy men temir jol kóligi qozǵalysynyń qaýipsizdigi erejelerin buzý", - dedi Turǵymbaev.
Eske sala keteiik, 15 qyrkúiek kúni keshke Almaty-Shamalǵan temirjol ótkelinde "Almaty-Qostanai" baǵytyndaǵy jolaýshylar poiyzy men Qaskeleńge bara jatqan reistik avtobýs soqtyǵysty.
Sońǵy málimet boiynsha, bir adam – avtobýs júrgizýshisi qaza boldy, taǵy úsheýi jan saqtaý bóliminde jatyr – ol 33 jastaǵy áiel men eki balasy (úsh jáne bes jasar).
Apattyń sebepterin anyqtaý úshin arnaiy komissiia quryldy.
