Foto:elements.envato.com
Almaty politsiiasy qalada "reketter bandasy" paida bolǵany týraly aqparatqa qatysty pikir bildirdi, - dep habarlaidy Tengrinews.kz.
Buǵan deiin BAQ "Almatyda reketter alym-salyq talap etip, atys shyǵarǵany" týraly habarlaǵan bolatyn. Atys kezinde eki er adam jaralanǵan. Oqiǵa Almatynyń Medeý aýdanynda bolǵan.
"Almatydaǵy reketter týraly aqparat shyndyqqa janaspaidy. Bul bir kóshede turatyn kórshiler arasyndaǵy qarapaiym turmystyq janjal. Sonymen qatar, birneshe adam boldy degen aqparat ta jalǵan. Kúdikti - bir adam, ol dereý ustalyp, ýaqytsha ustaý izoliatoryna qamaldy", - dedi Almaty qalalyq PD resmi ókili Saltanat Ázirbek.
Politsiia ókilderi shyndyqqa janaspaityn aqparat taratqany úshin jaýapkershilik qarastyrylǵanyn eske saldy.
"Azamattarǵa BAQ jáne áleýmettik jeliler arqyly kórineý jalǵan aqparat taratý qylmystyq jaýapkershilikke ákep soǵatynyn eskertemiz. Sondyqtan anyq jáne salmaqty pikir berý óte mańyzdy", - dep qosty Ázirbek.
Bul derekti qazir Medeý aýdandyq Politsiia basqarmasynyń aýmaqtyq bólimsheleri anyqtap jatyr.
"Derek sotaldy tergep-tekserýdiń biryńǵai tizilimine QR Qylmystyq kodeksiniń 293-baby 3-bóligi boiynsha tirkeldi. Kúdikti 1983 jylǵy Ý. esimdi er adam ustalyp, ýaqytsha ustaý izoliatoryna qamaldy. Shaǵynaýdanda turatyn tanystar arasynda aýyzsha janjal týyndap, Ý. esimdi er adam aldyn ala málimet boiynsha, travmatikalyq tapanshadan 1973 jylǵy B. esimdi jáne 1973 jylǵy G. esimdi er adamǵa oq atqan. Zardap shekkenderdiń ekeýi de aýrýhanaǵa jatqyzyldy. Qylmys jasalǵan qarý anyqtalyp jatyr. Jedel-tergeý toby quryldy", - dedi Medeý aýdandyq Politsiia basqarmasynyń bastyǵy, politsiia polkovnigi Dáýren Ótebaev.
